مون سون بارشوں کا زور دار سپیل برقرار ہے، لاہور، راولپنڈی، اسلام آباد سمیت ملک کے مختلف شہروں میں ہلکی اور کہیں موسلادھار بارش سے نشیبی علاقوں زیر آب آ گئے۔صوبائی دارالحکومت لاہور کے مختلف علاقوں گڑھی شاہو، ایبٹ روڈ، مال روڈ، اسلام پورہ، چوبرجی، اچھرہ، مسلم ٹاؤن، ماڈل ٹاؤن، گرین ٹاؤن، نشترٹاؤن، جوہرٹاؤن کے اطراف میں بادل برس پڑے جس سے شہر کا موسم خوشگوار ہوگیا۔
اس کے علاوہ پنجاب کے مختلف شہروں گوجرانوالہ، گوجر خان، ملتان اور دیگر شہروں میں بھی بادل جم کر برسے۔کرک اور اطراف میں تیز بارش سے سڑکیں تالاب کا منظر پیش کرنے لگیں، خانپور ہزارہ میں موسلادھار بارش سے ندی نالوں میں طغیانی سے نشیبی علاقے زیرآب آگئے۔
محکمہ موسمیات نے آئندہ 24 گھنٹے میں لاہور سمیت پنجاب کے بیشتر علاقوں میں شدید مون سون بارشوں کی پیشگوئی کی ہے، پی ڈی ایم اے کا کہنا ہے کہ بارشوں کا سلسلہ 13 جولائی تک جاری رہے گا۔
دوسری جانب شیخوپورہ میں بارش کے باعث گھر کی چھت گرنے سے 2 بچے جاں بحق ہوگئے جبکہ پاکپتن میں ریسکیو اہلکاروں نے گھر کے ملبے تلے دبے 4 افراد کو نکال لیا، جہلم ویلی گوہرآباد میں کلاؤڈ برسٹ سے گھروں اور گاڑیوں کو نقصان پہنچا، سڑکیں تباہ ہوگئیں۔رپورٹ کے مطابق پنجاب میں بارشوں کے باعث مختلف حادثات میں 9 افراد جان سے گئے اور متعدد زخمی ہوئے۔
ادھر بلوچستان میں مون سون کے دوران حادثات میں 10 افراد جاں بحق 7 زخمی ہو گئے، دریائے سندھ میں کندیاں کے مقام پر نچلے درجے کا سیلاب آگیا، چشمہ بیراج میں پانی کی آمد 3 لاکھ 73 ہزار 800 کیوسک ریکارڈ کی گئی ہے۔
واضح رہے کہ این ڈی ایم اے کے این ای او سی نے 10 جولائی تک ملک بھر میں شدید بارشوں، سیلابی صورتحال اور ممکنہ لینڈ سلائیڈنگ کا الرٹ جاری کیا گیا ہے، الرٹ کے مطابق دریائے کابل، سندھ، چناب اور جہلم میں پانی کی سطح میں اضافہ متوقع ہے، دریائے سندھ میں تربیلا، کالا باغ، چشمہ اور تونسہ کے مقامات پر نچلے درجے کا سیلاب متوقع ہے۔
دریائے چناب پر مرالہ اور خانکی جبکہ دریائے جہلم میں منگلا کے مقام پر نچلے درجے کے سیلاب کا خدشہ ہے، دریائے سوات اور پنجکوڑہ کے ملحقہ ندی نالوں میں بھی بارشوں کے باعث طغیانی کا خدشہ ہے۔ممکنہ بارشوں کی صورت میں ڈیرہ غازی خان اور راجن پور کے پہاڑی نالوں، ہل ٹورنٹس کے بہاؤ میں بھی شدید اضافہ متوقع ہے، بلوچستان کے اضلاع جھل مگسی، کچھی، سبی، قلعہ سیف اللہ، ژوب اور موسیٰ خیل کے مقامی ندی نالوں کے بہاؤ میں بھی شدید اضافے کا امکان ہے۔