اسلام آباد، راولپنڈی میں پاکستان میٹروبس سروس کے لیے بھی الیکٹرک بسیں چلانے کا فیصلہ کیا گیا، نگران وزیراعلیٰ پنجاب محسن نقوی نے کرائے میں 15روپے کا اضافہ روک دیا ۔
نگران وزیراعلیٰ نے کہا کہ ریونیو میں اضافے کے لیے نئے اور منفرد انداز سے کام کیا جائے، ورلڈ بینک کے تعاون سے لاہور میں پائلٹ پراجیکٹ کے تحت 27 الیکٹرک بسیں چلائی جائیں گی۔
لاہور ریلوے اسٹیشن تا گرین ٹاؤن الیکٹرک بسیں چلانے اورراولپنڈی، لاہور میں میٹروبس ٹریک کی تعمیر و مرمت، قذافی اسٹیڈیم اور شاہدرہ ریلوے اسٹیشن کی تعمیر و مرمت اور تزئین و آرائش کی منظوری دی گئی۔
سیکرٹری ٹرانسپورٹ نے بریفنگ میں بتایا کہ پنجاب ماس ٹرانزٹ اتھارٹی تقریباً سوا ارب مسافروں کا ہدف عبور کرچکی ہے اور اتھارٹی 6بس سروس سسٹم آپریٹ کر رہی ہے۔
اورنج لائن میٹرو ٹرین پر روزانہ 25ہزار طلبہ مفت سفر کر رہے ہیں، پنجاب ماس ٹرانزٹ اتھارٹی کو حکومت پاکستان کی طرف ڈویلپمنٹ لیڈر شپ کے ایوارڈ سے نوازا گیا ہے۔