پاکستان پیپلز پارٹی کے رہنما حسن مرتضیٰ کا کہنا ہے کہ پہلے ایک لاڈلہ تھا، اب دوسرا ہے لیکن ملک میں عوامی راج کب ہوگا۔
لاہور میں پریس کانفرنس کرتے ہوئے حسن مرتضیٰ نے کہا کہ صرف لاڈلہ بدلا ہے، کندھا نہیں بدلا، ملک اس طرح چلائیں گے تو اگلی حکومت چلتی نظر نہیں آتی، الیکشن میں ایساسرپرائز دیں کہ سب کی آنکھیں کھلی رہ جائیں گی۔
حسن مرتضیٰ نے کہا کہ پیپلز پارٹی کو ڈیل اور ڈھیل سے کوئی خطرہ نہیں، آپ کا مقابلہ اناڑی کھلاڑی سے نہیں، پیپلز پارٹی سے ہے، میاں صاحب کے بغیر پیپلز پارٹی الیکشن کو ادھورا سمجھتی ہے۔
پی پی رہنما کا کہنا تھاکہ نگران حکومت ہر وہ کام کر رہی ہے جو ان کے کرنے والا نہیں، الیکشن کروانا نگران حکومت کی ذمہ داری ہے جس کا نام نہیں لیا جا رہا، حیران ہوں (ن) لیگ کی نجکاری پالیسی کو یہ آگے بڑھا رہے ہیں۔
حسن مرتضیٰ نے کہا کہ ان کو سرکاری اداروں کو بیچنے کا حق کس نے دیا؟ پنجاب میں سرکاری ملازمین پر عرصہ حیات تنگ کیا جا رہا ہے، اساتذہ کو جیلوں میں ڈالنا اور ان پر پولیس تشدد زیادتی ہے۔
انہوں نے یہ بھی کہا کہ نواز شریف کوملنے والاریلیف بھی غلط ہے، خواجہ آصف میچ فکس کا بیان دے کر کیا تاثر دےرہے ہیں۔