نگران وزیرِاعظم انوار الحق کاکڑ نے عالمی قوتوں کی غزہ میں جاری بربریت پر خاموشی کو شرمناک قرار دیتے ہوئے کہا کہ پاکستان عالمی سطح پر فلسطینیوں کیلئے آواز بلند کرتا رہے گا۔
سعودی عرب کے دورے پر موجود نگران وزیرِاعظم انوار الحق کاکڑ نے فلسطین کے صدر محمود عباس سے ملاقات کی،نگران وزیراعظم نے یقین دہانی کرائی کہ پاکستان فلسطین کے لوگوں کی سفارتی و اخلاقی مدد جاری رکھے گا۔
انوار الحق کاکڑ نے کہا کہ عالمی قوتیں غزہ میں جنگ بندی، نہتے فلسطینیوں کا قتل عام روکنے میں کردار ادا کریں،دونوں رہنماؤں نے غزہ میں فوری غیرمشروط جنگ بندی اور امداد کی فراہمی کیلئے راہداری کے قیام کا مطالبہ کیا۔
خیال رہے کہ نگران وزیراعظم انوار الحق کاکڑ 3 روزہ دورے پر سعودی عرب میں موجود ہیں جہاں وہ مقبوضہ فلسطین کی صورتحال پرہنگامی عرب سربراہی کانفرنس اور اسلامی تعاون تنظیم (اوآئی سی) اجلاس میں شرکت کریں گے۔
غزہ کی خطرناک صورتحال پر غور کیلئے آج ریاض میں عرب سربراہ کانفرنس ہوگی جس میں غزہ کی بگڑتی صورتحال پر تبادلہ خیال کیا جائے گا۔