پاکستان مسلم لیگ ن کے سربراہ سابق وزیراعظم نواز شریف نے کہا ہے کہ وہ معاشرے میں حسد، گالیاں اور بغض لائے، ن لیگ نے بلوچستان میں سڑکوں کا جال بچھایا، ڈیمز بنائے، کچھی کینال کیلئے 50 ارب روپے دیے، لوڈشیڈنگ اور دہشتگردی ختم کی، باتیں کرنے والے بہت آئے، اُن لوگوں میں اور ہم میں کچھ تو فرق ہے۔
خوشی ہے کہ کوئٹہ کی رونقیں بحال ہوئی ہیں، آپ میں سے بہت سے لوگ ہمارے ساتھ کام کرچکے ہیں، سابقہ ریکارڈ کو دیکھیں تو مسلم لیگ ن نے بلوچستان کے عوام کی خدمت کی ہے، ن لیگ کے بعد کی حکومت نے تو سی پیک منصوبے کو بہت نقصان پہنچایا۔
کوئٹہ میں سابق رکن قومی اسمبلی ڈاکٹر درشن کی جانب سے منعقدہ دیوالی تقریب سے خطاب کرتے ہوئے ن لیگ کے صدر شہباز شریف کا کہنا تھا کہ قیام پاکستان، تعمیر پاکستان اور دفاع پاکستان میں اقلیتیں اہم فریق تھیں، ہیں اور رہیں گی، 2018 سے 2022 تاریکی کے سال تھے، روشنیوں کا دور شروع ہونے والاہے۔
مریم نواز نے کہاکہ بلوچستان کے بارے میں باتیں سب نے کی ہیں، عملی کام نواز شریف نے کیا ہے، مسلم لیگ ن مشکلات، ظلم اور جبر کے باوجود متحد رہی، ن لیگ کو بلوچستان میں مضبوط کرنا آج کی سب سے بڑی ضرورت ہے۔