احتساب عدالت اسلام آباد کے جج محمد بشیر کی جانب سے جاری آج کی سماعت کے حکم نامے میں کہا گیا ہے کہ رجسٹرار آفس کی جانب سے 190 ملین پاؤنڈ اسکینڈل ریفرنس کی اسکروٹنی مکمل کر لی گئی ہے لہٰذا عدالت ریفرنس کو ٹرائل کے لیے منظور کرتی ہے۔
عدالتی حکم کے مطابق اس ریفرنس میں سابق چیئرمین پی ٹی آئی جوڈیشل ریمانڈ پر جیل میں ہیں جبکہ بشریٰ بی بی عبوری ضمانت پر رہا ہیں، دیگرملزمان مرزا شہزاد اکبر، ضیا المصطفیٰ نسیم، ذلفی بخاری، فرحت شہزادی اور دیگر کے ناقابل ضمانت وارنٹ گرفتاری جاری کیے جاتے ہیں۔
تحریری حکم میں کہا گیا ہے کہ استغاثہ آئندہ سماعت پر وارنٹ گرفتاری کی تعمیل کے حوالے سے رپورٹ جمع کروائے،سائفر کیس میں عمران خان اور شاہ محمود پر 12 دسمبر کو فرد جرم عائد کی جائیگی
حکم نامے کے مطابق آج سابق چیئرمین پی ٹی ائی کو اڈیالا جیل میں قائم احتساب عدالت میں پیش نہیں کیاگیا، سپرنٹنڈنٹ اڈیالا جیل آئندہ سماعت پر انہیں عدالت میں پیش کریں۔
وزارت قانون کے نوٹیفکیشن کے مطابق 190 ملین پاؤنڈز ریفرنس کا ٹرائل اڈیالا جیل راولپنڈی میں کیا جائے گا اور ریفرنس کی آئندہ سماعت 6 دسمبر 2023 کو ہوگی۔