پاکستان تحریک انصاف کے سینیئر رہنما شاہ محمودقریشی نے کہا ہے کہ سپریم کورٹ کے فیصلے پر تاریخ اپنا فیصلہ کرے گی، پوری قوم نے دیکھا پی ٹی آئی کو کیسی لیول پلیئنگ فیلڈ ملی۔
انہوں نےاڈیالا جیل میں کمرہ عدالت میں صحافیوں سے غیر رسمی گفتگو میں کہاکہ ہم الیکشن لڑیں گے اور آزاد لڑیں گے، پوری قوم نے دیکھا کہ پی ٹی آئی کو کیسا لیول پلینگ فیلڈ ملا، لکھ لیں کہ اس الیکشن کا جنازہ نکل گیا ہے۔
میری بیٹی اسکروٹنی کیلئے گئی اس کے کاغذات چھینےگئے، بیٹی کو شہر چھوڑنا پڑا، ہماراپیغام ہے جس کے پاس جو نشان ہے وہ اس کو ہی بلا سمجھے، ہمارے پاس پلان بی تھا۔
ہم نے سمجھا تھا بلا نہیں تو بلے باز پر ووٹر مطمئن ہوگا، عدالتوں کا فیصلہ تسلیم ہے، تاریخ سپریم کورٹ کے فیصلے پر اپنا فیصلہ ضرور کرے گی،بانی پی ٹی آئی کاایک ہی مطالبہ ہےکہ ملک میں صاف،شفاف انتخابات کرائے جائیں۔
کیا آپ سمجھتے ہیں انٹراپارٹی الیکشن اور بلے کا نشان حاصل کرنے کیلئے آپ کی جماعت سے غلطیاں ہوئیں؟ اس پر وائس چیئرمین پی ٹی آئی نے کہا کہ الیکشن کمیشن نے ہمارے انٹرا پارٹی الیکشن پر سوال اٹھائے باقی جماعتوں کے الیکشن پر کسی نے سوال نہیں اٹھایا۔
سپریم کورٹ میں اگر کیسز کا اوپن ٹرائل ہوسکتاہے تو یہاں کیوں نہیں؟ سائفر کیس کے ٹرائل کو لائیو دکھایا جائے۔