مسلم لیگ ن کے ڈپٹی جنرل سیکرٹری اور لاہور کے حلقے این اے127 سے مسلم لیگ ن کے امیدوار عطا اللہ تارڑ نے حلقے میں پیپلز پارٹی پر ووٹوں کی خریدوفروخت کا الزام لگادیا۔
خیال رہےکہ این اے 127 میں چیئرمین پیپلز پارٹی بلاول بھٹو زرداری بھی الیکشن لڑ رہے ہیں۔
لاہور میں پریس کانفرنس کرتے ہوئے عطا اللہ تارڑ نےکہا کہ ہمیں اطلاع آرہی تھی کہ پیپلزپارٹی ووٹوں کی خرید و فروخت میں ملوث ہے، انہوں نے کوشش کی کہ پیسےکا بے دریغ استعمال کیا جائے، سندھ سے گاڑیوں کے ذریعے پیسےلائےگئے، پیپلزپارٹی نے حلقے میں ووٹوں کی خریدو فروخت شروع کیم کمیشن ایجنٹ مقررکیےگئےکہ جو زیادہ ووٹ لائےگا اس کا زیادہ کمیشن ہے۔
عطا اللہ تارڑ نےکہا کہ ایک سیٹ اپ موجود ہے جو ووٹوں کی خرید و فروخت میں ملوث ہے، ہمیں بلاول بھٹو زرداری حلقے میں کہیں نظر نہیں آرہے، آپ کوشش کر رہے ہیں پیسا استعمال کرکے ووٹوں میں تبدیل کیا جائے، یہ کرپشن کا پیسا سندھ کے عوام کا حق تھا، لاڈلے کو ایم این اے بنانےکے لیے اوچھے ہتھکنڈے استعمال کیے جا رہے ہیں، آپ کا سارا تکیہ پیسے پر ہے، سندھ سے آکر لوگ بیٹھے ہوئے ہیں۔
این اے127 سے مسلم لیگ ن کے امیدوار کا کہنا تھا کہ ہماری قیادت نے ہمیشہ صاف ستھری سیاست کی ہے، ہم نے ہمیشہ ووٹوں کی سیاست کی ہے، ہماری ان لوگوں پر بھی نظر ہے جن کو آپ نے پیسے دیے ہیں، جنہوں نے ووٹ بیچا ان کے خلاف بھی کارروائی ہوگی، ہمیں چار ٹیب ملے ہیں، ہمارے پاس تمام ڈیٹا آچکا ہے،تین لوگ پکڑے ہیں جنہیں کوٹ لکھپت تھانے منتقل کیا ہے، منصوبہ بندی تھی زیادہ سے زیادہ ووٹوں کی خریداری کرنی ہے، آپ نے لوگوں کی مجبوریوں کا فائدہ اٹھاتے ہوئے ضمیر خریدنےکی کوشش کی۔
ان کا کہنا تھا کہ ہم نے اپنے ورکرز کو روکا ہوا ہے، ہم نہیں چاہتے لاہورکا امن خراب ہو، جو لوگ ووٹ بیچنے کے لیے جارہے تھے ہم ان کے ساتھ ہی وہاں پہنچے، ہم آپ کو یہاں واک اوور نہیں دینے والے، مقابلہ کریں گے، آپ شکست سے گھبرا کر اوچھے ہتھکنڈوں پر اتر آئے ہیں، آپ کو کوئی غیر قانونی کام نہیں کرنے دیں گے، الیکشن کمیشن نے ہماری درخواست پر پیر کو وقت دیا ہے، ڈسٹرکٹ مانیٹرنگ افسر ہماری درخواستوں کو سنجیدگی سے دیکھیں، ضرورت پڑی تو ہم عدالت کا دروازہ بھی کھٹکٹائیں گے، ہم پیپلزپارٹی کو من مانی نہیں کرنے دیں گے۔
انہوں نےکہا کہ بلاول بھٹو زرداری میڈیا پر آئیں اورکہیں کہ ووٹوں کی خریدو فروخت نہیں کی، آصف زرداری کے پیچھے چھپنا چھوڑیں اور مقابلہ کریں، جو بھی ووٹ بیچےگا وہ بھی قانون کی گرفت میں آئےگا۔
عطا اللہ تارڑ نے مزید کہا کہ نواز شریف نے کراچی میں امن قائم کیا،کراچی کے حالات صرف نواز شریف نے ٹھیک کیے،کراچی کے حالات خراب کرنے میں لیاری گینگ اور آصف زرداری کی پارٹی کا ہاتھ تھا،لاہور میں قتل و غارت اور بھتہ خوری کی سیاست نہیں ہونے دیں گے۔
اس کے علاوہ عطا اللہ تارڑ نے ایکس پر اپنے اکاؤنٹ پر ویڈیو بھی پوسٹ کی ہے جس میں انہوں نے مختلف ثبوت پیش کیے ہیں۔