سابق وزیر مملکت برائے پارلیمانی امور علی محمد خان نے کہا کہ پی ٹی آئی کےحمایت یافتہ امیدوار ملک کی سب سے بڑی سیاسی قوت بن کر ابھرے ہیں، عوامی مینڈیٹ کو تسلیم نہ کیا گیا تو لوگ احتجاج پر مجبور ہوں گے۔
اب سڑکوں پر نہیں پارلیمان میں سیاست اور عوام کے ملک کے مسائل حل کرنے کا وقت ہے، پی ٹی آئی کارکنوں کو احتجاج کرنے پر مجبور نہ کیا جائے، ملک کو آگے لیکر جانے کی ضرورت ہے، اسی لیے عوام کے فیصلے کو تسلیم کیا جائے۔
خیبرپختونخوا سمیت پورے پاکستان میں ہمیں اکثریت ملی، الیکشن سے پہلے اور بعد میں مختلف سیٹوں پر ہماری اکثریت کو اقلیت میں بدلنے کی کوشش ہو رہی ہے، جمہوریت کے دشمن تحریک انصاف کی فتح کو شکست میں بدلنے کیلئے بدترین دھاندلی کر رہے ہیں۔
نواز شریف اپنی ہٹ دھرمی چھوڑ کر عوامی فیصلے کا احترام کریں، ان کے وزیراعظم بننے کا خواب چکنا چور ہو چکا، اب جاگ جائیں، نواز شریف تسلیم کر لیں کہ عوام نے آپ کو مسترد کر دیا ہے۔
مسلم لیگ ن کے سنجیدہ رہنما میاں صاحب کو مشورہ دیں کہ بڑے پن کا مظاہرہ کریں، جعلی وزیراعظم بن کر ذلت کا سودا نہ کریں، تحریک انصاف کے ہاتھ پاؤں باندھ کر الیکشن میں اتارا گیا۔
نواز شریف کی پریشانی ان کے چہرے سے عیاں تھی، نواز شریف کی بھرائی ہوئی آواز سے ہی ان کی خفت جھلک رہی تھی۔