وزیراعظم شہباز شریف نےوزارت خارجہ اسلام آبادمیں سفیروں کے اعزاز میں عشائیے میں شرکت کی اور خطاب کرتے ہوئے کہا کہ رمضان کا مہینہ دنیا میں امن پھیلانے کا پیغام دیتا ہے۔
پاکستان عالمی برادری کے تمام ممالک سے دوستانہ تعلقات چاہتاہے، پاکستان کسی سے عداوت نہیں رکھناچاہتا اور دیگر ملکوں سے تجارتی تعلقات بڑھانا چاہتا ہے۔
پاکستان بطور ذمہ دارملک امن اورخوشحالی کیلئے علاقائی کردار ادا کرتا رہے گا، ہمارا آئین تمام پاکستانی شہریوں کو مساوی انسانی حقوق کی ضمانت دیتا ہے۔
رمضان ہم آہنگی، امن اور رواداری کا پیغام ہے، پاکستان میں ہرکسی کو اپنے عقیدے کے مطابق عبادت گاہوں میں جانے کی آزادی ہے۔
پاکستان عالمی برادری کے ساتھ دوستانہ تعلقات کا خواہاں ہے، ہم نہتے فلسطینی اور کشمیری بہن بھائیوں کے شانہ بہ شانہ کھڑے ہیں، پاکستان سلامتی کونسل کی غزہ میں جنگ بندی سے متعلق قرارداد کا خیر مقدم کرتا ہے اور قرارداد پر فوری عمل درآمد ہو نا چاہیے۔
گورننس کے نظام میں اصلاحات اور ملک کا معاشی استحکام ہماری حکومت کی اولین ترجیحات ہیں، ملکی مفادات کی ترویج کےلیے ہم بین الاقوامی شراکت داروں کے ساتھ تعلقات کو مزید فروغ دیں گے۔