وزیر اعلیٰ بلوچستان میر سرفراز بگٹی نےضلع ڈیرہ بگٹی کے علاقے بیکڑ میں کھلی کچہری سے خطاب کرتے ہوئے کہا ہے کہ گورننس کا نظام شدید بد انتظامی کا شکار ہے ، اسے درست کرنے میں وقت لگے گا۔
100 فیصد درست کرنے کا دعوٰی نہیں کرتا، تاہم درست سمت کا تعین ضرور کریں گے، جزا و سزا کے بغیر گورننس میں بہتری نہیں آسکتی۔
میں عوام میں سے ہی ہوں ،اس لیے عوامی مسائل کا ادراک ہے ، عام آدمی کے مسائل کے حل کیلئے پوری نیک نیتی سے کام کررہے ہیں۔
صحت کے شعبے میں مختص وسائل سے بلوچستان کے ہر فرد کا علاج ملک کے مہنگے ترین نجی اسپتال سے ہوسکتا ہے، تعلیم کا بجٹ صوبے کے ہر بچے پر خرچ کریں تو ہر بچہ مہنگے ترین نجی اسکول میں تعلیم حاصل کر سکتا ہے۔
سوچنا ہوگا کہ مختص وسائل کا استعمال کیسے ہو رہا ہے، عوامی مسائل مختص وسائل کے غلط استعمال کے باعث ہیں، بدعنوانی روک کر عوام کے وسائل عوام پر خرچ کرنا ہوں گے۔
بلوچستان میں سرکاری امور میں جوابدہی کا عمل کمزور پڑ چکا ہے ، ہمیں مصلحتوں سے نکل کر صوبے اور غریب عوام کے لیے سوچنا ہوگا، بلوچستان کی بے امنی کا تعلق پسماندگی سے نہیں ہے۔