گورنر سندھ کامران ٹیسوری نے میڈیا سے گفتگو کرتے ہوئے کہا ہے کہ پورے سندھ کو انفارمیشن ٹیکنالوجی کا حب بناکر دنیا میں مثال قائم کریں گے، حیدرآباد کے شہری انفارمیشن ٹیکنالوجی کے جدید کورسزمفت کریں۔
نوجوانوں کو جدید ترین فیلڈ میں آنا چاہیے اور یہ موقع ہے کہ وہ کلاؤڈ اپلائیڈ جنریٹیو آرٹیفیشل انٹیلی جنس انجینئر بنیں، کراچی کے بعد حیدرآباد میں بھی فری آئی ٹی کورسز کرائے جارہے ہیں۔
اس کیلئے داخلے جاری ہیں، ہرامیدوار کو مفت آئی ٹی کورس کرایا جائے گا، انہیں جنریٹیو اے آئی انجینئرنگ کے سرٹیفیکٹ دیے جائیں گے۔
وہ چاہتے ہیں کہ نوجوانوں کو جدید تعلیم کے ہتھیار سے لیس کیا جائے تاکہ نہ صرف وہ اپنا اور اپنے خاندان کا بلکہ ملک کا مستقبل بھی روشن کریں۔
پوری توجہ سے اگر کوئی اس فیلڈ کو سمجھ لے تو ایسا انجینئر با آسانی گھر بیٹھے 15 سے 20 لاکھ روپے ماہانہ کما سکتا ہے اور اس سے ملک کو بھی غیرمعمولی زرمبادلہ کی رقم حاصل ہوگی۔
کراچی میں 50 ہزار نوجوان آن سائٹ آئی ٹی کورس کررہے ہیں جب کہ ساڑھے 4 لاکھ یہی کورس آن لائن کررہے ہیں، ان طلبہ میں سے بہت سے ایسے ہیں جنہوں نے تیسرے ماہ ہی سے 200 سے 500 ڈالر کمانا شروع کردیے ہیں۔
یہ دور انفارمیشن ٹیکنالوجی کا ہے اس لیے ان کی کوشش ہے کہ قوم اس فیلڈ میں کہیں پیچھے نہ رہ جائے، آئی ٹی کورسز کا یہ سلسلہ کراچی اور حیدرآباد کے بعد سکھر سمیت سندھ کے دیگر شہروں تک پھیلایا جائے گا۔