ایمنڈ نے حکومت پنجاب کا ہتکِ عزت سے متعلق مجوزہ بل اور وفاقی حکومت کا پیکا ترمیمی بل مسترد کردیا۔
ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز ایمنڈ کے جنرل باڈی اجلاس کے دوران ملک میں آزادی صحافت کی صورتحال اور الیکٹرانک میڈیا کو درپیش مسائل کا جائزہ لیا گیا۔
اجلاس میں کہا گیا یہ بات یقینی بنائی جائے کہ ہتکِ عزت جیسے کسی قانون سے آزادی اظہار رائے متاثر نہ ہو۔
ایمنڈ نے کہا ہے کہ ہتکِ عزت اور فیک نیوز کے تدارک کے لیے قانون سازی کے مخالف نہیں لیکن کوئی بھی قانون بنانے سے پہلے اسٹیک ہولڈرز کو اعتماد میں لیا جانا ضروری ہے کیونکہ اعتماد میں لیے بغیر منظور کیا گیا کوئی بھی قانون آزادی اظہار رائے کا گلا گھونٹنے کے برابر ہوگا۔
ادھر جنرل باڈی اجلاس میں سال 2024 سے 2026 کے لیے جیو نیوز کے اظہر عباس کو ایمنڈ کا صدر، سما نیوز کے طارق محمود کو سیکرٹری جنرل، ایکسپریس نیوز کے ایاز خان کو سینئر نائب صدر، نیو نیوز کے محمد عثمان کو نائب صدر، ہم نیوز کے ریحان احمد اور 24 نیوز کے میاں طاہر کو جوائنٹ سیکرٹری منتخب کرلیا گیا جب کہ شہاب محمود فنانس سیکرٹری ہوں گے۔