گورنر خیبر پختونخوا فیصل کریم کنڈی نے لاہور میں میڈیا سے گفتگو کرتے ہوئے کہا ہے کہ 9 مئی کے جو اصل ملزم تھے وہ تو خیبرپختونخوا کے وزیراعلیٰ بن گئے، مرکز اور صوبے کے درمیان پل کا کردار اداکروں گا۔
گورنر کے پی فیصل کریم کنڈی نے کہا کہ وزیراعظم کا مشکور ہوں کہ انہوں نے کے پی میں لوڈشیڈنگ کم کی، وزیراعظم سے صوبے کے مسائل پر بات کی ہے،، امید ہے مستقبل میں ایسا ہی رویہ رہا تو وفاق کی جانب سے مسئلہ حل ہو جائے گا۔
فیصل کریم کنڈی نے کہا کہ وزیر اعلیٰ کے پی کو دعوت دیتا ہوں کہ گورنر ہاؤس آئیں، صوبے کے امن اور ترقی کے لیے ملکر بیٹھیں، وزیر اعلیٰ کے پی سےکہا تھا دلائل کے ساتھ وفاق سے بات کریں اور اپنے مسائل بتائیں مگر وہ ایسی زبان استعمال کرتے تھے جس سے مسئلےکا حل نہیں نکلتا تھا۔
9 مئی کے ماسٹر مائنڈ سمیت تمام ملزمان کو کیفرکردار تک پہنچایا جائے، پی ٹی آئی ماضی کی غلطیوں پر معافی مانگےتو ہم بات چیت کرنے کے لیے تیار ہیں لیکن اگر وہ اسٹیبلشمنٹ کے کندھوں کے ذریعے آنا چاہتے ہیں تو کچھ نہیں کہہ سکتے۔