وزیر اعظم شہباز شریف نے کابینہ ارکان کے ساتھ چین کے شہر شینزن میں ہواوے ہیڈ کوارٹرز کا دورہ کیا ،وزیراعظم اور ہواوے کے چیئرمین نے ملاقات کی جس میں شہباز شریف نے انہیں پاکستان کے دورے اور سرمایہ کاری کی دعوت دی۔
وزارت انفارمیشن ٹیکنالوجی اور ہواوے کے درمیان فریم ورک معاہدے پر دستخط ہوئے،فریم ورک معاہدے کے تحت ہواوے مصنوعی ذہانت سمیت انفارمیشن ٹیکنالوجی کے شعبے میں دولاکھ پاکستانی نوجوانوں کو مفت تربیت فراہم کرے گا۔
پاکستان میں سیف سٹیز کے قیام، ای گورننس، کلاؤڈ سروسز اور معیشت کی ڈیجیٹلائیزیشن میں بھی بھرپور تعاون کیا جائے گا،اس کے علاوہ وزیرِ اعظم سے چینی کمپنی ٹرانشیئن ہولڈنگز کے بانی اور چیئرمین نے بھی ملاقات کی اور پاکستان میں موبائل فون یونٹ میں سرمایہ کاری میں وسعت کی یقین دہانی کرائی۔
بزنس کانفرنس بہترین کاوش ہے، ہمیں ماضی کو پیچھے چھوڑ کر آگے بڑھنا ہوگا، چین کو شاندار بزنس فورم کے انعقاد پر مبارکباد پیش کرتاہوں، شینزن شہر کی ترقی ہمارے لیے مشعل راہ ہے، چین نے پاکستان کے ہر صوبےمیں منصوبے لگائے، بیلٹ اینڈ روڈ منصوبہ ترقی کی ضمانت ہے۔
چین نے ہر مشکل وقت میں پاکستان کا ساتھ دیا، شی جن پنگ کی قیادت میں چین دنیا کی دوسری بڑی معیشت بن چکا ہے، چین نے ترقی کیلئے فرسودہ نظام کو ترک کرکے جدید طریقے اپنائے، پاکستان کرپشن پر قابو پانےکیلئے مؤثر اقدامات کررہاہے۔
چین ہمارا سب سے قابل بھروسہ دوست ملک ہے، پاکستانی کمپنیوں کے سربراہان بھی چینی ماڈل اپنائیں، 5 چینی باشندوں کی دہشتگردی کے واقعےمیں موت افسوس ناک لمحہ تھا، پاکستان میں چینی باشندوں کی سکیورٹی یقینی بنائیں گے اور چینی باشندوں کو فول پروف سکیورٹی دینے کا تہیہ کیا ہے۔
چین میں قرضوں کیلئے نہیں،کاروبار اور ترقی کیلئے آیا ہوں، پاکستان میں کاروبار میں آسانی پیدا کرنےکےلیے بزنس کونسل قائم کی،دونوں ملکوں کے درمیان مختلف شعبوں پر مفاہمت کی متعدد یادداشتوں پر دستخط کیے جائیں گے۔
اس کے علاوہ شہبازشریف پاکستان چین دوستی اور تجارت کی تقریب میں بھی شریک ہوں گے اور سی پیک منصوبوں پرکام کرنے والی نمایاں چینی کمپنیوں کے چیف ایگزیکٹو افسران سے بھی ملاقاتیں کریں گے۔