سندھ کے سینیئرصوبائی وزیر ناصر حسین شاہ نے سکھر میں میڈیا سے گفتگو کرتے ہوئے کہا ہے کہ 30 لاکھ گھروں میں بجلی نہیں ہے ، انتہائی غریب گھرانوں کو پہلے سولر سسٹم فراہم کریں گے،بجٹ میں کوشش کی گئی ہے کہ عام آدمی کا خیال رکھا جائے۔
الیکشن کے دوران بلاول بھٹو زرداری نے جو وعدے کیے انہیں پورا کرنے جارہے ہیں، مفت بجلی سے متعلق اور پینے کے صاف پانی کے لیے منصوبے تیار کیے ہیں، 30لاکھ گھروں میں بجلی نہیں، انہیں پہلے بجلی فراہم کریں گے، انتہائی غریب گھرانوں کو ایک پنکھا اور 3 بلب جلانے کے لیے پہلے سولر سسٹم فراہم کریں گے۔
متوسط طبقےکو بھی سپورٹ کرنےکے لیے لائحہ عمل ترتیب دیا جارہا ہے، متوسط طبقے سے جو خاندان خود سولر سسٹم لگاناچاہیں ان کے لیےقرض اسکیم بنارہے ہیں، سولر سسٹم کے لیےقرض کا سود سندھ حکومت ادا کرے گی۔
پیپلزپارٹی کو وفاقی بجٹ پر تحفظات ہیں، سندھ کےساتھ گزشتہ دہائی میں کتنی بڑی زیادتی کی گئی ہے، دوسرے صوبوں میں کھربوں روپے میں کام ہوئے، سندھ کو دو تین فیصد سےزیادہ پی ایس ڈی پی میں حصہ نہیں دیاگیا۔
کراچی کے لیےجوبجٹ مختص ہے اس میں اربوں روپےکےکام ہورہے ہیں۔وفاقی بجٹ کے حوالے سے انہوں نے کہا کہ امید ہے کہ جب بجٹ پاس ہوگا تو پیپلز پارٹی کی سفارشات پرٹیکس کی شرح کم ہوگی۔
اپوزیشن کی جانب سے احتجاج ملکی مسائل کا حل نہیں، بانی پی ٹی آئی کا المیہ ہےکہ ہر بات ان کی ذات تک گھومتی ہے، امیدکرتےہیں بانی پی ٹی آئی جیل سےکچھ سیکھ کر آئیں گے، عید پر شہدا کی قربانیوں کو یادرکھنا چاہیے۔