کراچی میں شدید گرمی کے باوجود کئی علاقوں میں 12سے14گھنٹے کی بجلی کی لوڈشیڈنگ جاری ہے جہاں ڈیفنس، گلشن اقبال، گلبرگ، ملیر، ماڑی پور، میمن گوٹھ، نارتھ کراچی،اورنگی ٹاؤن اور ناظم آباد میں بجلی کی طویل بندش کا سلسلہ جاری ہے۔
اس کے علاوہ ایف بی ایریا، گڈاپ، گارڈن، گذری، گلستان جوہر، گلشن معمار ، بلدیہ، بلوچ کالونی، سوک سینٹر، ریلوے کالونی، جیکب لین، جیل روڈ، کورنگی، لانڈھی، لیاقت آباد اور لیاری میں 10گھنٹے کی لوڈشیڈنگ کی جارہی ہے۔
کراچی شدید گرم اور مرطوب موسم کی لپیٹ میں ہے اور آج شہر میں زیادہ سے زیادہ درجہ حرارت 39.9 ڈگری رہا جبکہ گرمی کی شدت مختلف علاقوں میں 48 سے 50 ڈگری تک محسوس کی گئی۔
شہر میں ہیٹ اسٹروک سے مزید افراد بھی جاں بحق ہوگئے۔ انچارج ہیٹ اسٹروک سیل سول اسپتال ڈاکٹر نظام کے مطابق سول اسپتال میں ہیٹ اسٹروک سے 4 ہلاکتیں رپورٹ ہوئی ہیں۔
انہوں نے کہا کہ سول اسپتال میں ہیٹ اسٹروک سے ہلاکتوں کی تعداد 12 ہوگئی ہے، آج ہیٹ اسٹروک سے 63 کیسز رپورٹ ہوئے، تمام متاثرہ مریض ہیٹ ایمرجنسی وارڈ میں زیرعلاج ہیں۔
دوسری جانب جناح اسپتال میں بھی ہیٹ اسٹروک کے مزید 17 کیسز رپورٹ ہوئے ہیں۔ انچارج ہیٹ اسٹروک وارڈ جناح اسپتال کے مطابق متاثرہ مریضوں کی عمر 32 سے 60سال کے درمیان ہے اور تمام مریض شدید ڈی ہائیڈریشن کا شکار تھے۔