ایم کیو ایم کے سینئر رہنما مصطفیٰ کمال نے کراچی میں پریس کانفرنس کرتے ہوئے کہا ہےکہ کے الیکٹرک کے حوالے سے پرائیویٹائزیشن کو ٹھیک کرنا ہوگا اور ایک سے زائد کمپنیوں کو بجلی کی ڈسٹری بیوشن دینے کی ضرورت ہے۔
انہوںنے کہا ہےکہ ہنی مون ٹائم ختم ہوگیا ہے اب ملک کی سالمیت کا مسئلہ ہے، روس بھی معاشی بحران کی وجہ سے ٹکڑے ٹکڑے ہوگیا، آج ہمیں اچھے فیصلوں اور درست سمت کی ضرورت ہے۔
ایم کیو ایم بجلی کے بحران پر اپنا مؤقف سامنے رکھنا چاہتی ہے، اس سال پاور سیکٹر کے لاسز 600 ارب روپے ہیں، ہمیں پاور کمپنیوں کو 1700 ارب روپے دینے ہیں جب کہ ملک کی ڈیولپمنٹ کےلیے بجٹ میں 1400 ارب روپے ہیں، پاکستان کی معیشت کا سب سے بڑا زخم پاور سیکٹر کے لاسز ہیں۔
پاکستان میں ضرورت سے زیادہ بجلی موجود ہے مگر 18،18 گھنٹے کی لوڈشیڈنگ ہورہی ہے، جب زیادہ بجلی دیتے ہیں تو زیادہ لاسز ہوتے ہیں اس لیے انہوں نےسوچا کہ بجلی ہی کم کردو تاکہ لاسز کم ہوں، آپ اپنے لاسز کو بچانے کےلیے بجلی کی پیداوار کم کررہے ہیں، یہ سارے لاسز وہ ادا کررہا ہے جو بل دے رہا ہے، یہ نظام لوگوں کی برداشت سے باہر ہوگیا ہے، سفید پوش انسان بجلی کا بل دینے سے قاصر ہے۔
تمام ڈسکوز کو پرائیویٹائز کردینا چاہیے، کے الیکٹرک کی پرائیویٹائزیشن کا تجربہ زیادہ اچھا نہیں ہے، کے الیکٹرک کے حوالے سے پرائیویٹائزیشن کو ٹھیک کرنا ہوگا اور ایک سے زائد کمپنیوں کو بجلی کی ڈسٹری بیوشن دینے کی ضرورت ہے، دنیا بھر میں بجلی کی کمپنیوں کے حوالے سے لوگوں کے پاس آپشنز ہیں۔