ترجمان کاؤنٹر ٹیررازم ڈیپارٹمنٹ کے مطابق گوجرانوالہ کے علاقے ایمن آباد میں سی ٹی ڈی اور دہشت گردوں کے درمیان فائرنگ کا تبادلہ ہوا، جس میں ایک دہشت گرد اپنے ہی ساتھیوں کی فائرنگ سے مارا گیا جب کہ دو طرفہ فائرنگ میں سی ٹی ڈی ٹیم معجزانہ طور پر محفوظ رہی۔
خفیہ اطلاع پر کی گئی چھاپا مار کارروائی کے دوران 3 دہشت گرد موقع سے فرار ہونے میں کامیاب ہو گئے۔ سی ٹی ڈی حکام نے مقدمہ درج کرلیا۔ ہلاک ہونے والے دہشت گرد کے قبضے سے اسلحہ ، سیفٹی فیوز، بارودی مواد ، کارتوس اور دھماکا خیز مواد برآمد ہوا ہے۔
ہلاک دہشت گرد کی شناخت کے لیے نادرا سے مدد لی جا رہی ہے۔ کالعدم تنظیم کے دہشت گرد اہم مقامات پر دہشت گردی کا منصوبہ بنارہے تھے۔ فرار دہشت گردوں کی تلاش کے لیے سرچ آپریشن جاری ہے۔
ترجمان کے مطابق محکمہ انسداد دہشت گردی محفوظ پنجاب کے لیے ہر ممکن اقدام کررہا ہے۔