محکمہ موسمیات نے کراچی میں آج تیز ہوا کے ساتھ بارش کا امکان ظاہر کیا اور بالائی خیبر پختونخوا اور پنجاب میں کہیں کہیں تیز بارش کی پیش گوئی کی ۔
محکمہ موسمیات کے مطابق سندھ کے کئی علاقوں میں آج شام یا رات میں بارش ہوسکتی ہے جہاں آج شام یا رات میں جیکب آباد، دادو، جامشورو اور کرا چی میں تیز ہوا کے ساتھ بارش کا امکان ہے۔
محکمہ موسمیات کے مطابق اسلام آباد، راولپنڈی اور لاہور سمیت پنجاب کے کئی علاقوں میں بارش ریکارڈ کی گئی جب کہ جڑواں شہروں میں علی الصبح تیز بارش ہوئی، ضلع خوشاب میں بھی موسلا دھار بارش ہوئی۔
دوسری جانب لاہور کے علاقوں گڑھی شاہو، لکشمی چوک، مال روڈ، باغبان پورہ، دھرم پورہ، گلشن راوی اور اقبال ٹاؤن میں بھی بادل برسے۔
بارشوں کے باعث سندھ کے اکثر علاقوں میں سیلابی صورتِ حال برقرار ہے، سینکڑوں دیہات زیر آب گئے، لوگ نقل مکانی پر مجبور ہیں۔
سانگھڑ کی تحصیل ٹنڈو آدم میں 50 سے زائد دیہات سیلاب سے متاثر ہونے کے بعد مکین اپنی مدد آپ کے تحت نقل مکانی پر مجبور ہیں۔
نوشہرو فیروز میں پوائنٹ بکھری کے مقام پر دریائے سندھ میں سیلابی ریلا ٹکرانے کے بعد بچاؤ بند پر دو روز قبل شگاف پڑنے سے مزید 10 گاؤں اور فصلیں زیرِ آب آگئیں جبکہ پشتوں کی مرمت کا کام جاری ہے۔
سکھر میں 98 فیصد علاقوں سے برساتی پانی کا نکاس مکمل کرلیا گیا، سکھر اسٹیشن، کچی آبادی گول ٹکری اور بے نظیر کالونی سے بھی پانی کے نکاسی کا عمل جاری ہے، نکاس آب کا کام آج مکمل ہونے کا امکان ہے۔
دوسری جانب وزیراعلیٰ سندھ مراد علی شاہ نے لاڑکانہ، کیرتھر پہاڑی کے قریب حمل جھیل اور دادو کا دورہ کیا اور سیلاب متاثرین کیلئے زیر تعمیر گھروں کا معائنہ کیا۔
لاڑکانہ میں میڈیا سے گفتگو کرتے ہوئے وزیراعلیٰ سندھ نے کہا کہ 26 اگست کو سیلاب کا خطرہ ہے جس کا جائزہ لینے کیلئے آئے ہیں۔
ان کا کہنا تھا کہ سندھ میں اب تک محکمہ موسمیات کی پیش گوئی سے بہت زیادہ بارشیں ہو چکی ہیں۔