اسلام آباد میں متحدہ عرب امارات (یو اے ای) کے 53 ویں قومی دن کی مناسبت سے تقریب میں صدر مملکت آصف علی زرداری اور وزیراعظم شہبازشریف نے شرکت کی۔
اسلام آباد میں ہونے والی تقریب میں صدرمملکت آصف زرداری، وزیراعظم شہباز شریف، چیئرمین سینیٹ یوسف رضا گیلانی سمیت وزرا بھی شریک ہوئے۔
یواے ای کے سفیر نے صدرمملکت، وزیراعظم اور چیئرمین سینیٹ کا استقبال کیا۔
اس موقو پر تقریب سے خطاب کرتے ہوئے وزیراعظم کا کہنا تھاکہ متحدہ عرب امارات کی حکومت اور عوام کو قومی دن کی مبارکباد پیش کرتاہوں، متحدہ عرب امارات نے خوشحالی اور ترقی کی مثال قائم کی ہے، پاکستان اور یو اے ای کے درمیان دیرینہ تعلقات ہیں۔
انہوں نے کہاکہ پاکستان میں صحت، تعلیم اور بنیادی ڈھانچے کی ترقی میں یو اے ای نے اہم کردار ادا کیا، متحدہ عرب امارات نے ہمیشہ پاکستان کے ساتھ تعاون کیا، پاکستان یو اے ای کی علاقائی سالمیت اور خودمختاری کی حمایت کرے گا۔
ان کا کہنا تھاکہ آئی ایم ایف پروگرام میں یو اے ای کے تعاون پر مشکور ہیں، یو اے ای کے تعاون کےبغیر آئی ایم ایف پروگرام ممکن نہیں تھا، پاکستان کیلئے ویزا کی بحالی پاکستانیوں سے محبت کی عکاس ہے۔
تقریب سے خطاب میں صدر مملکت آصف زرداری کا کہنا تھاکہ یو اے ای نے شاندار ترقی کی ہے، دونوں ممالک کے درمیان تاریخی تعلقات قائم ہیں اور مشکل وقت میں یو اے ای کی امداد اور تعاون پر مشکور ہیں۔
انہوں نے کہا کہ قومی دن کے موقع پر متحدہ عرب امارات کی قیادت اورعوام کو مبارکباد پیش کرتا ہوں، اتحاد کے بعد سے متحدہ عرب امارات نے قابل ذکر ترقی کی، عرب امارات تجارت، سرمایہ کاری اورسیاحت کے شعبوں میں عالمی مرکز کے طور پر ابھرا۔
صدرمملکت کا کہناتھاکہ پاکستان اور متحدہ عرب امارات کے درمیان تاریخی رشتہ ہے، شیخ زاید بن سلطان النہیان نے دونوں ممالک کے درمیان پائیدارتعلقات کی بنیاد رکھی اور پاک متحدہ عرب امارات تعلقات مذہب، اعتماد اور باہمی احترام پر مبنی ہیں، پاکستان نے یو اے ای کے قیام سے 6 ماہ قبل ہی سفیربھیج کرسفارتی نمائندگی قائم کی۔
انہوں نے کہا کہ پاکستان اور متحدہ عرب امارات کے درمیان تجارت مسلسل بڑھ رہی ہے، متحدہ عرب امارات میں مقیم 18 لاکھ پاکستانیوں سے دوطرفہ تعلقات کومزید تقویت ملی، امارات کے ساتھ آئی ٹی، توانائی، زراعت، سیاحت سمیت اہم شعبوں میں تعاون بڑھانے کے خواہاں ہیں۔
صدر مملکت نئ کہا کہ پاکستان کی اقتصادی بحالی میں تیزی آرہی ہے، پاکستان میں سرمایہ کاری کے لیے سازگار ماحول ہے، یو اے ای کے کاروباری اداروں کومختلف شعبوں میں سرمایہ کاری کی دعوت دیتا ہوں اور یقین ہے کہ مختلف شعبوں میں متعدد معاہدوں سے دوطرفہ تعاون مزید گہرا ہوگا۔
صدر مملکت آصف زرداری اور وزیراعظم شہباز شریف نے متحدہ عرب امارات کے سفیر کے ساتھ مل کر کیک بھی کاٹا۔