صدر مملکت آصف زرداری نے کہا ہے کہ عوام کو گھبرانے کی ضرورت نہیں، سب کچھ دیکھ لوں گا، آپ کو خوشخبریاں دیں گے۔
گڑھی خدا بخش میں جلسہ عام سے خطاب میں آصف زرداری کا کہنا تھاکہ مشکلیں اور تکالیف ہیں، ہم مشکلوں سے لڑنے کے عادی ہیں، آپ کا پانی اور گیس کہیں نہیں جائے گا جو جس کا حق ہے، وہ اس کو ملےگا۔
انہوں نے کہا کہ کےپی کے، پنجاب، بلوچستان اور سندھ کوبھی ان کا حق ملے گا۔
صدرآصف زرداری کا کہنا تھاکہ آج میں کارکنوں کی طاقت کی وجہ سے دوسری بار صدر ہوں، ہم نے 43 سال بعد بھٹو شہید کا فیصلہ ریورس کرایا، اب وہ ہمیشہ عدالتی قتل رہے گا۔
ان کا کہنا تھاکہ دھرتی، فیڈریشن اور پاکستان کے ساتھ وفا ہے، ملک کوبچاناہے، ملک کوان کے ہاتھوں سے بچانا ہے، ایک زمانے میں کہتے تھے کہ نادر آرہاہے نادر آرہاہے تو ہمارے بزرگوں نے کہاکہ جب نادر نادر ہے، تو قادر بھی قادر ہے۔
انہوں نے کہا کہ اگر کوئی سپر پاور پاور ہےتو مولا بھی پاور ہے، مولا ہی ایک پاور ہے جس پر ہم یقین رکھتے ہیں، آپ کی دعاؤں، طاقت سے ہم اس مشکل حالات سے پاکستان کو نکالیں گے، آپ کو خوشخبریاں دیں گے، یہ ہمارا کچھ نہیں بگاڑ سکتے، ہم سب سنبھالیں گے ہر چیز کو ٹھیک رکھیں گے۔