پاک بھارت کشیدگی کی وجہ سے ملتوی ہونے کے بعد پی ایس ایل سیزن 10 کا دوبارہ سے شاندار آغاز کیا گیا۔
تفصیلات کے مطابق راولپنڈی اسٹیڈیم میں پاکستان سپرلیگ کے بقیہ میچز کے پہلے مقابلے سے قبل شاندار افتتاحی تقریب ہوئی جس میں اداکار حمزہ علی عباسی نے میزبان کے فرائض انجام دیے۔
تقریب میں معروف پاکستانی گلوکار و موسیقار ساحر علی بگا نے اپنی آواز کا جادو جگایا اور ملی نغمے سے شائقین کا لہو گرما دیا۔
اس کے علاوہ گلوکار اسرار شاہ نے شاندار پرفارمنس پیش کی اور اسے بھی مسلح افواج کے نام کیا گیا۔
اس کے علاوہ اسٹیڈیم میں شاندار آتشبازی کی گئی جس سے آسمان رنگ و نور سے بھر گیا۔
اسٹیڈیم میں میچ دیکھنے کیلیے چیف آف آرمی اسٹاف جنرل سید عاصم منیر بھی پنہچے جن کا شائقین نے تالیاں بجا کر پُرتپاک استقبال کیا۔
پاکستان کرکٹ بورڈ کی جانب سے جاری اعلامیے میں کہا گیا ہے کہ ’آج ہم سب پاکستان کے شہدا، بہادر افواج کو خراج تحسین پیش کرنے کیلیے یہاں جمع ہیں، ہماری فوج پاکستان کے دفاع کیلیے اگلی صف میں کھڑے ہوکر مقابلہ کرتی ہے‘۔
اعلامیے میں کہا گیا ہے کہ پی ایس ایل کے ری شیڈول میچز کے تین روز کو پاکستان کی مسلح افواج کے نام کیا گیا ہے۔ پی سی بی نے دعا کی کہ اللہ ہمارے بہادر جوانوں کا حوصلہ ایسے ہی بڑھائے اور انہیں ثابت قدم رکھے۔