شاہین آفریدی اور شاداب کے انگلش لیگ کھیلنے پر جنید خان ناراض

کراچی(شوریٰ نیوز)شاہین آفریدی اور شاداب کے انگلش لیگ کھیلنے پر جنید خان ناراض،قومی ٹیم کے سینئر کھلاڑیوں کو زیادہ احتیاط سے ہینڈل کر نے کی ضرورت ہے،پاکستانی بولر جنید خان کا کہنا ہے کہ قومی کرکٹ ٹیم کے فاسٹ بولر شاہین شاہ آفریدی اور آل راؤنڈر شاداب خان کو انگلش لیگ ٹی ٹوئنٹی بلاسٹ کھیلنے نہیں جانا چاہیے تھا۔اپنے یوٹیوب چینل پر بات کرتے ہوئے جنید خان نے کہا کہ پاکستان کرکٹ بورڈ (پی سی بی) کو قومی ٹیم کے سینئر کھلاڑیوں کو زیادہ احتیاط سے ہینڈل کرنا چاہیے کیونکہ یہ ورلڈکپ کا سال ہے اور اس وقت انہیں ٹاپ کنڈیشن میں ہونا چاہیے۔جنید خان نے کہا میری رائے میں یہ بہتر ہوتا اگر بورڈ شاہین کو ٹی ٹوئنٹی بلاسٹ کھیلنے کی اجازت نہ دیتا اور انہیں اپنی فٹنس پر کام کرنے اور کچھ آرام کرنے کا مشورہ دیتا کیونکہ ورلڈ کپ قریب ہے اور آگے مزید سیریز ہیں، ہمیں اس کی ضرورت ہے۔شاداب خان کے حوالے سے جنید نے کہا کہ ان کو پہلے ہی فٹنس کے کچھ مسائل ہیں، اور انہیں لیگ میں کھیلنے کی اجازت بھی دی گئی ہے، میری رائے میں پی سی بی کو ان چیزوں پر سوچنا چاہیے۔تاہم، جنید کا خیال ہے کہ انگلینڈ میں لیگ کرکٹ لیگ اسپنر اسامہ میر اور تیز گیند باز زمان خان جیسے نوجوانوں کے لیے فائدہ مند ثابت ہوگی۔