شمالی غزہ میں صیہونی فوج کی شیلنگ اور فائرنگ میں صحافی بھی زد میں آگئے۔
صیہونی بربریت سے گزشتہ24 گھنٹوں میں شہید فلسطینیوں کی تعداد 100 سے زیادہ ہوگئی جب کہ امداد کے منتظر نہتے فلسطینیوں پر بھی گولیاں برسائی گئیں۔
دوسری جانب عالمی عدالت انصاف میں فلسطینی سر زمین پر صیہونی حکومت کے 57 سالہ قبضے کے خلاف سماعت ہوئی۔
دوران سماعت جنوبی افریقا کے نمائندے نے کہا کہ فلسطینیوں کے حقوق سے مسلسل انکاری صیہونی حکومت نے غزہ میں عالمی عدالت کے حکم سمیت تمام عالمی قوانین کی دھجیاں اڑادی ہیں۔
افریقی نمائندے نے مطالبہ کیا کہ عالمی عدالت صیہونی قبضے کو غیرقانونی قرار دے۔
علاوہ ازیں جنگی جنون میں مبتلا صیہونی وزیراعظم نیتن یاہو نے یرغمالیوں کی رہائی کے بدلے حماس کی شرائط ماننے سے انکار کردیا ہے۔
ایک بیان میں صیہونی وزیراعظم نے کہا کہ ہم پر اندرونی اور بیرونی دباؤ ہے کہ اپنے مقاصد حاصل کیے بنا ہی جنگ ختم کریں اور کسی بھی قیمت پر یرغمالیوں کی رہائی کا معاہدہ کرلیں لیکن ہم یرغمالیوں کی رہائی کیلئے حماس کے شرائط نہیں مان سکتے۔
نیتن یاہو کا کہنا تھا کہ حماس کی شرائط مان کر یرغمالیوں کو واپس لانے کا مطلب ہوگا کہ صیہونی ریاست نے حماس کے سامنے اپنی شکست قبول کر لی۔
ادھر صیہونی ریڈیو سے بات کرتے ہوئے صیہونی وزیر بیزلیل سیموٹریک نے کہا کہ نیتن یاہو نے واضح کردیا ہے کہ ہم صیہونی یرغمالیوں کی رہائی کی کوئی قیمت ادا نہیں کریں گے۔