غزہ میں جنگ بندی کی کوششوں اور یرغمالی کی رہائی کے معاہدوں کیلئے قطر رواں ہفتے حماس اور صیہونی حکومت کے درمیان بات چیت کی میزبانی کرے گا۔
مصری سکیورٹی ذرائع کے مطابق قطر میں رواں ہفتے معاہدے کو حتمی شکل دینے کے لیے صیہونی حکومت اور حماس وفد کے درمیان بات چیت متوقع ہے۔
ذرائع نے بتایا کہ اس کے بعد صیہونی حکومت اور حماس کے نمائندے مصر جائیں گے جہاں معاہدے پر عملدرآمد کے وقت اور طریقہ کار پر بات چیت ہوگی۔
دوسری جانب صیہونی وزیراعظم بن یامین نیتن یاہو کی ہٹ دھرمی برقرار ہے اور نیتن یاہو کا کہنا ہے کہ اگر معاہدہ ہو جاتا ہے تو رفح آپریشن میں تاخیر ہو سکتی ہے مگر رفح آپریشن ضرورہوگا۔
ادھر امریکی قومی سلامتی مشیر جیک سلیوان نے کہا ہے کہ شہریوں کی حفاظت کے بغیر رفح آپریشن نہیں ہونا چاہیے۔
مزید برآں صیہونی فوج نے شمالی غزہ، خان یونس اور رفح میں بمباری کی جس کے نتیجے میں فلسطینی شہدا کی تعداد 30 ہزار کے قریب پہنچ گئی جبکہ حماس سے لڑائی میں مزید 3 صیہونی فوجی افسر ہلاک ہوگئے۔