مقبوضہ فلسطین کے علاقے غزہ میں رفح کے مقام پر صیہونی حملے میں شہید ہونے والی حاملہ خاتون کے بچے کو ڈاکٹروں نے بچا لیا۔
غیر ملکی خبررساں ادارے کے مطابق صیہونی حملے میں شہید ہونے والی حاملہ خاتون سبرین السکنی کے شوہر اور بیٹی بھی شہید ہوگئے تھے۔
نومولود بچی کی حالت بہتر بتائی جارہی ہے، بچی کی دیکھ بھال کرنے والے ڈاکٹر کے مطابق پیدائش کے وقت بچی کا وزن 1.4 کلوگرام تھا اور اب اس کی حالت بہتر ہورہی ہے۔
نومولود کو انکیوبیٹر میں رکھا گیا ہے اور شناخت ’شہید سبرین کی بیٹی‘ رکھی گئی ہے، بچی کے ایک رشتے دار نے بتایا اس کی بہن اپنی ہونے والی بہن کا نام ’روح‘ رکھنا چاہتی تھی۔
خیال رہے کہ صیہونی فوج کی رفح میں دو مکانات پر بمباری سے 19 فلسطینی شہید ہوگئے جن میں ایک ہی خاندان کے 14 بچے بھی شامل ہیں۔