رومانیہ، عدالت نے اینڈریو ٹیٹ پر فرد جرم عائد کردی

رومانیہ (شوریٰ نیوز)رومانیہ، عدالت نے اینڈریو ٹیٹ پر فرد جرم عائد کردی،سابق امریکی کک باکسر پرخواتین کی اسمگلنگ کےالزامات تھے، عدالت نے انسانی اسمگلنگ اورخواتین کا جنسی استحصال کرنے کے الزامات کا سامنا کرنے والے سابق امریکی کک باکسر اینڈریو ٹیٹ پر فرد جرم عائد کردی۔ اینڈریو ٹیٹ اور ان کے بھائی ٹرسٹن سمیت رومانیہ کی دو خواتین ملزمان پر فرد جرم عائد کی گئی ہے۔تمام ملزمان 7 خواتین کے خلاف بدسلوکی کی تحقیقات مکمل ہونے تک نظر بند ہیں۔دوسری جانب ملزمان نے پہلے ہی اپنے اوپر لگے تمام الزامات کو مسترد کردیا ہے۔سابق کک باکسر اینڈریو ٹیٹ اور ان کے بھائی رومانیہ میں انسانی اسمگلنگ کے مقدمے کا سامنا کرنے والے ہائی پروفائل مشتبہ افراد ہیں۔اینڈریو ٹیٹ خود کو ’عورتوں سے نفرت کرنے والا‘ کہتے ہیں، وہ اپنی متعدد ویڈیوز میں انتہائی پرتعیش زندگی کا اظہار کرچکے ہیں، وہ خوبصورت خواتین کے ساتھ تیز کاروں کے ساتھ یا نجی جیٹ طیاروں میں گھومتے نظر آئے۔نظربند ہونے سے قبل چار مشتبہ افراد کو 29 دسمبر سے 31 مارچ تک پولیس کی تحویل میں رکھا گیا تھا، جبکہ رومانیہ کے پروسیکیوٹرز نے نظربندی میں توسیع کی درخواست بھی دی ہے۔عدالت اب 21 جون کو فیصلہ کرے گی کہ آیا نظر بندی میں 30 روز کی توسیع کی جائے یا سزا میں کمی کردی جائے۔پروسیکیوٹر کے مطابق 36 سالہ اینڈریو ٹیٹ پر متاثرہ خواتین میں سے ایک کا ریپ کرنے کا الزام بھی عائد کیا گیا ہے جبکہ 34 سالہ ٹرسٹن کو تشدد پر اکسانے کا الزامات کا سامنا ہے۔اینڈریو ٹیٹ کے قانونی ٹیم کے ترجمان کا کہنا ہے کہ ’ہم ان کی بے گناہی ثابت کرنے اور ان کی ساکھ کو بحال کرنے کے موقع (ایک مقدمے کی سماعت) کے لیے تیار ہیں۔تاہم مقدمے کی سماعت فوری طور پر شروع نہیں ہوگی۔رومانیہ کے قانون کے تحت پہلے کیس بخارسٹ کی عدالت کے ابتدائی چیمبر میں بھیجا جاتا ہے، جہاں جج 60 دنوں کے اندر کیس کی قانونی حیثیت کا جائزہ لیتا ہے۔