یورپ میں ہیٹ ویو، اٹلی کے 15 شہروں میں ریڈ الرٹ جاری ہو گیا

روم (شوریٰ نیوز)یورپ میں ہیٹ ویو، اٹلی کے 15 شہروں میں ریڈ الرٹ جاری ہو گیا،امریکہ کے فینیکس شہر میں درجہ حرارت 43 ڈگری سینٹی گریڈ سے بڑھنے کا امکان ،امریکی ریاست ایری زونا میں گرمی کا نیا ریکارڈ بننے کا امکان ہے شدید گرمی کی لہر نے جنوبی یورپ کو ان دنوں اپنی لپیٹ میں لے رکھا ہے جس کے باعث روم، فلورینس اور بولوگنا میں ریڈ الرٹ جاری کیا گیا ہے آئندہ دنوں میں سب سے زیادہ گرمی پڑنے کا امکان ہے۔ یورپ میں آئندہ ہفتے ایک اورہیٹ ویو کا امکان ہے جس میں درجہ حرارت ریکارڈ سطح تک جا سکتا ہے۔یورپین اسپیس ایجنسی سیٹلائٹ کے ذریعے زمین اور سمندر سے درجہ حرارت کو مانیٹر کرتی ہے اور ایجنسی کا کہنا ہےکہ اٹلی، اسپین، فرانس، جرمنی اور پولینڈ گرمی سے شدید متاثر ہوسکتے ہیں۔ یورپ میں اس سے قبل سب سے زیادہ درجہ حرارت 48.8 ڈگری سینٹی گریڈ اگست 2021 میں ریکارڈ کیا گیا تھا تاہم محکمہ موسمیات کا کہنا ہےکہ آئندہ ہفتے پڑنے والی گرمی میں درجہ حرارت اس کے آس پاس تک رہ سکتا ہے۔اٹلی کی حکومت نے ریڈ الرٹ والے شہروں کے لیے ہدایات جاری کی ہیں جس میں کہا گیا ہےکہ ان علاقوں کے شہری صبح 11 بجے سے شام 6 بجے تک براہ راست سورج کی روشنی میں جانے سے گریز کریں جب کہ عمر رسیدہ اور بیمار افراد کے لیے خاص طور پر احتیاط برتی جائے۔ اسی عرصے کے دوران حالیہ دنوں میں یونان میں بھی گرمی کی شدت میں اضافہ ہوا ہے جہاں درجہ حرارت 40 ڈگری سینٹی گریڈ ریکارڈ کیا گیا۔