ایران، تجاوزات آپریشن، عمارت گر نے سے4 جاں بحق,11 زخمی

تہران(شوریٰ نیوز) ایران، تجاوزات آپریشن، عمارت گر نے سے4 جاں بحق,11 زخمی،ایران میں غیر قانونی عمارت کو گرانے کی مہم زور و شور سے جاری ہے،ایران میں تجاوزات کے خلاف آپریشن کے دوران ایک عمارت گرگئی جس کے نتیجے میں 2 پولیس اہلکار اور 2 شہری ہلاک ہوگئے جب کہ 11 زخمی ہیں۔ ایران کے جنوب مغربی علاقے میں پولیس اہلکار غیرقانونی رہائشی عمارتوں کے خلاف آپریشن کے لیے پہنچے۔ علاقہ مکین بھی بڑی تعداد میں احتجاج کے لیے جمع ہوگئے۔ایک عمارت کے اضافی حصے کو گرایا جا رہا تھا کہ پوری عمارت زمین بوس ہوگئی۔ ملبے تلے ایک درجن سے زائد افراد دب گئے۔ریسکیو ٹیم نے امدادی کاموں کے دوران ملبے سے 4 لاشیں نکالیں جب کہ 11 افراد کو زخمی حالت میں اسپتال منتقل کیا گیا ہے۔جاں بحق ہونے والوں میں 2 پولیس اہلکار بھی شامل ہیں۔سوشل میڈیا پر وائرل ہونے والی تصاویر اور ویڈیوز کو شیئر کرتے ہوئے دعویٰ کیا جا رہا ہے کہ ایک غیرقانونی عمارت کو گرانے کے دوران دیگر چار عمارتیں بھی منہدم ہوئیں۔ گزشتہ دو برسوں کے دوران 46 ہزار سے زائد غیر قانونی عمارتوں کو مسمار کیا گیا ہے۔یاد رہے کہ مئی 2022 میں ایران کے جنوب مغربی علاقے میں ہی ایک عمارت گرنے سے 43 افرادجاں بحق ہوگئے تھے۔