مقبوضہ کشمیر کے ضلع راجوری میں خفیہ اطلاعات کی بنیاد پر اعلیٰ سطح کا سرچ آپریشن کیا گیا جس کے دوران ایک گھر میں چھپے ہوئے مسلح افراد نے بھارتی فوج پر فائرنگ کردی۔
فائرنگ میں بھارتی فوج کا اہلکار موقع پر ہلاک ہوگیا جب کہ تین کو شدید زخمی حالت میں اسپتال منتقل کیا گیا جہاں 2 اہلکاروں نے زخموں کی تاب نہ لاتے ہوئے دم توڑ دیا۔
کشمیر پولیس نے دعویٰ کیا ہے کہ سرچ آپریشن میں ایک عسکریت پسند بھارتی فوج کی فائرنگ میں ہلاک ہوا ، پولیس نوجوان کی شناخت ،ثبوت پیش کرنے میں ناکام رہی ۔
یہ پہلی بار نہیں جب بھارت نے اپنی فوج کی کمزوریوں اور کوتاہیوں کا ملبہ پاکستان پر ڈالنے کی کوشش کی ہے۔ اس سے قبل پلواما خودکش دھماکے میں بھی پاکستان کو ملوث کرنے کی کوشش کی گئی تھی۔
تاہم بھارت پاکستان کے خلاف کسی بھی قسم کا ثبوت پیش کرنے میں ناکام رہا ہے جس پر اسے عالمی سطح پر ہزیمت بھی اُٹھانا پڑتی ہے لیکن مودی سرکار اپنی مذموم حرکتوں سے باز نہیں آتی۔