صیہونی فوج نے غزہ میں مسجد پر حملہ کر کے 50 نمازیوں کو شہید کر دیا جبکہ متعدد افراد زخمی ہو گئے۔
عرب میڈیا کے مطابق صیہونی طیاروں نے وسطی غزہ کے علاقے سبرا میں مسجد پر اس پر بمباری کی جب مسجد میں نماز جاری تھی اور مسجد نمازیوں سے بھری ہوئی تھی۔
صیہونی فورسز کی جانب سے اردنی فیلڈ اسپتال پر فضائی حملہ کیا گیا جس میں 7 ارکان زخمی ہو گئے جبکہ صیہونی فوج ایک بار پھر غزہ کے الشفا اسپتال میں داخل ہو گئی، اسپتال کے جنوبی داخلی راستے کے کچھ حصوں کو تباہ کر دیا، بیسمنٹ سمیت مختلف حصوں میں تلاشی کے دوران نہ یرغمالی ملے، نہ کسی سرنگ کا نشان ہاتھ لگا۔
صیہونی فوج کی جانب سے الشفا اسپتال سے حماس کا اسلحہ اور وردیاں ملنے کا دعویٰ کیا گیا تاہم صیہونی دعویٰ ڈاکٹروں اور حماس نے جھوٹا قرار دے دیا۔
صیہونی فوج کے اکاؤنٹ سے بطور ناقابل تردید شواہد پوسٹ کی جانے والی الشفا اسپتال کی وڈیو ڈیلیٹ کر دی گئی، ایڈیٹنگ اور کچھ چیزیں چھپانے کے بعد دوبارہ نشر کرنے سے صیہونی دعوؤں پر شہبات بڑھ گئے۔
الجریزہ کے مطابق الشفا اسپتال سے رپورٹنگ کرنے والے امریکی ٹی وی کے رپورٹر اور صیہونی دعوؤں میں بھی تضاد سامنے آگیا جبکہ قطر نے غزہ میں اسپتالوں پر حملوں کی عالمی تحقیقات پر زور دیتے ہوئے الشفا اسپتال کے اندر صیہونی حکومت کی تازہ کارروائی کو "جنگی جرم” قرار دے دیا۔
خیال رہے کہ صیہونی فوج کی غزہ میں بمباری کو 40 روز ہو چکے ہیں اور اب تک ساڑھے 11 ہزار سے زائد فلسطینی شہید اور 25 ہزار سے زائد زخمی ہو چکے ہیں۔
صیہونی فوج نے اسکولوں، اسپتالوں اور پناہ گزین کیمپوں پر بھی بمباری کر کے فلسطینیوں کو شہید کیا جبکہ مغربی کنارے اور خان یونس کے علاوہ دیگر علاقوں میں بھی صیہونی حکومت کی چھاپہ مار کارروائیوں کا سلسلہ جاری ہے۔