حماس اور صیہونی حکومت کے درمیان قطر اور مصر کی ثالثی میں ہونے والی عارضی جنگ بندی کے ساتویں روز حماس نے مزید 8 صیہونیوںکو رہا کردیا۔
غیر ملکی خبر ایجنسی کے مطابق حماس نے پہلے فرانس کی دوہری شہریت کی حامل 21 سالہ لڑکی اور 40 سالہ خاتون کو رہا کیا جس کے بعد 2 بچوں اور 4 خواتین سمیت مزید 6 صیہونیوں کو ریڈ کراس کے حوالے کیا۔
حماس کی جانب سے صیہونی یرغمالیوں کی رہائی کے بعد صیہونی حکومت کو بھی 30 فلسطینی قیدیوں کو رہا کرنا پڑا، صیہونی قید سے رہائی پانے والے فلسطینیوں میں 23 بچے اور 7 خواتین شامل ہیں۔
جمعے کے روز حماس اور صیہونی حکومت کے درمیان جنگ بندی معاہدے کے توسیعی مدت ختم ہونے کے بعد آخری گھنٹوں میں جنگ بندی میں مزید ایک روزہ توسیع کا فیصلہ کیا گیا تھا۔
حماس اور صیہونی حکومت کے درمیان جنگ بندی معاہدے کے خاتمے پر عالمی برادری کی جانب سے تشویش دونوں فریقین پر تشدد کے خاتمے اور قیام امن کیلئے جنگ بندی میں توسیع پر زور دیا گیا تھا۔
جنگ بندی معاہدے کے خاتمے سے متعلق امریکی وزیر خارجہ انٹونی بلنکن نے صیہونی وزیر اعظم سے ملاقات کی اور جنگ بندی کے دورانیے میں توسیع پر زور دیتے ہوئے کہا کہ قیدیوں کا تبادلے اور غزہ میں بے گھر ہونے والے افراد تک امداد پہنچانے کیلئے جنگ بندی میں توسیع ضروری ہے۔
دوسری جانب صیہونی فوج کی جانب سے مقبوضہ مغربی کنارے میں ایک بس اسٹاپ پر فائرنگ کرکے تین فلسطینیوں کو شہید کردیا گیا جبکہ صیہونی فوج کی فائرنگ سے 8 افراد زخمی بھی ہوئے۔
حماس نے مغربی کنارے میں صیہونی فوج کے ہاتھوں بے گناہ فلسطینیوں پر فائرنگ کرکے انہیں قتل کرنے کی مذمت کرتے ہوئے کہا کہ ایسے واقعات تنازعے کو مزید شدت کی طرف دھکیل سکتے ہیں۔
ادھر حماس اور صیہونی حکومت کے درمیان غزہ میں جنگ بندی میں مزید 2 روز کی توسیع کیلئے قطر اور مصر کی کوششیں جاری ہیں۔
دوسری جانب فلسطینی ہلال احمر کے مطابق عارضی جنگ بندی کے 6 روز کے دوران امدادی سامان لیکر 11 ہزار 32 ٹرک غزہ پہنچے ہیں۔
حماس نے غزہ میں صیہونی جارحیت کے خاتمے اور فلسطینی عوام سے اظہار یکجہتی کیلئے جمعہ، ہفتہ اور اتوار کو دنیا بھر میں مظاہروں اور عوامی اجتماعات کی اپیل کی ہے۔