صیہونی قیدیوں کے اہل خانہ نے غاصب صیہونی حکومت کی فوج سے کہا ہے کہ وہ غزہ سے نکل جائے اور قیدیوں کے تبادلے کے لیے مزاحمت کی شرائط کو قبول کرلے۔
ارنا کی رپورٹ کے مطابق صیہونی قیدیوں کے بہت سے خاندانوں کا کہنا ہے کہ صیہونی حکومت کے حملے فلسطین کی اسلامی مزاحمتی تحریک حماس کو شکست نہیں دے سکتے لہٰذا ہمارا مطالبہ ہے کہ غزہ کی پٹی سے فوج کو واپس بلایا جائے۔ غاصب صیہونی قیدیوں کے اہل خانہ نے یہ بات ریڈیو صیہونی حکومت کو دیئے گئے انٹرویو میں کہی۔
غاصب صیہونی حکومت کے قیدیوں کے اہل خانہ نے قیدیوں کے تبادلے کے لیے فلسطینی مزاحمت کے ساتھ صیہونی حکومت کے معاہدے پر زور دیا اور کہا کہ نیتن یاہو کی کابینہ کے نزدیک قیدیوں کی جانوں کی کوئی اہمیت نہیں ہے اور جنگ جاری رکھ کر قیدیوں کی زندگی کو سنگین خطرات سے دوچار کر رہی ہے۔
رپورٹ کے مطابق صیہونی قیدیوں کے اہل خانہ نے کہا کہ جب صیہونی فوج کو شکست ہو چکی ہے تو اب فتح کی بات کرنا بے معنیٰ ہے اور قیدیوں کی رہائی کی خاطر پسپائی اختیار کرلی جائے۔
صیہونی قیدیوں کے خاندانوں کا کہنا تھا کہ جہاں نیتن یاہو کی کابینہ غزہ کی پٹی میں حماس کے ایک رہنما یحییٰ السنوار کو قتل کرنا چاہتی ہے تو وہیں 136 صیہونی قیدی مزاحمتی فورس کی قید میں ہیں۔