پاکستان کی بڑی صنعتوں نے دسمبر کے دوران گزشتہ 21 ماہ کی سب سے زیادہ پیدوار کا دعویٰ کیا ہے اور اس پیداوار میں نمایاں حصہ زراعت، پٹرولیم، ٹیکسٹائل اور ادویہ سازی کی صنعتوں کا ہے۔
ادارہ برائے شماریات نےجاری اپنی رپورٹ میں کہا ہے کہ بڑی صنعتی پیداوار میں دسمبر 2022 کے مقابلے میں دسمبر 2023 کے دوران 3 اعشاریہ 43 فیصد کا اضافہ ہوا ہے ۔
اگر نومبر 2023 سے موازنہ کیا جائے تو صنعتی پیداوار دسمبر 2023 کے دوران 15 اعشاریہ 69 فیصد بڑھی ہے تاہم اگررواں مالی سال کی پہلی ششماہی (جولائی تا دسمبر) کا جائزہ لیں تو صنعتی پیداوار میں گزشتہ مالی سال کے اسی عرصے کے دوران صفر اعشاریہ 39 فیصد کمی نظر آتی ہے۔
جولائی تا دسمبر 2022 کے مقابلے میں جولائی تا دسمبر 2023 کے دوران خوراک، مشروبات، کپڑے، پیٹرولیم مصنوعات، کیمیات، کھاد، ادویہ، غیرمعدنی اشیا، مشینری اور دیگر سامان کی پیداوار میں اضافہ نظر آتا ہے ،تمباکو، لوہے اور اسٹیل، بجلی کے سامان، فرنیچر اور دیگر کی پیداوار میں کمی ہوئی۔