پیپلز پارٹی کے رہنما سینیٹر وقار مہدی نے چیئرمین ایم کیوایم خالد مقبول صدیقی کی تقریر پر ردعمل دیتے ہوئے کہا ہے کہ ایم کیو ایم نے اپنے حصے کی قربانی نہیں اپنے گناہوں کا کفارہ ادا کیا ہے۔
1988 ہو یا 2024 ایم کیو ایم کو ہمیشہ کراچی اور حیدرآباد سے خیرات میں نشستیں دی گئیں، اردو بولنے والے سندھی ہمیشہ قتل و غارت اور نفرت کی سیاست کو مسترد کرتے آئے ہیں، شہر میں امن کیلئے ضروری ہے کہ دہشتگردوں کو لگام ڈال کر رکھا جائے۔
ان کا کہنا تھا کہ خالد مقبول صدیقی الطاف حسین ٹو بننے کی ناکام کوشش کر رہے ہیں۔
واضح رہے کہ خالد مقبول صدیقی نے کہا تھا کہ ایم کیو ایم کے بغیر بے نظیر بھٹو وزیراعظم نہیں بن سکتی تھیں، خدشات کے باوجود وزیراعظم بننے کیلئے انہیں ووٹ دیا۔ ہم اپنے حصے کی بہت زیادہ قربانی دے چکے اب کسی اور کی باری ہے۔