یمن کی اعلی سیاسی کونسل کے چیئرمین مہدی المشاط نے اتوار کی رات نیشنل ڈیفنس کونسل کی نشست سے خطاب میں کہا کہ وہ یمن کی ثابت قدم اور پائیدار قوم اور مسلح افواج کے دلیر مجاہدین کی قدردانی کرتے ہیں۔ انہوں نے کہا کہ جارحیت شروع ہونے سے پہلے ہی ہمیں، نصرت خدا سے، دشمن کے حملوں کو ناکام بنانے کی حیاتی اہمیت کی باتیں معلوم ہوگئی تھیں جن کی وجہ سے ہم بہت سے نقصانات سے بچ گئے۔
انہوں نے کہا کہ ہمارے پاس اس بات کی ٹھوس اطلاعات ہیں کہ امریکا کا طیارہ بردار جنگی جہاز ٹرومین جارحیت کے شروع میں ہی اپنا کنٹرول کھو بیٹھا اور شکست سے دوچار ہوگیا۔ اس جنگی بحری جہاز سے دشمن کو کوئی فائدہ حاصل نہ ہوا اور وہ دوسرے وسائل لانے پر مجبور ہوگیا۔ یمن کی اعلی سیاسی کونسل کے چیئرمین نے غزہ کے عوام کی بھرپور حمایت جاری رکھنے پر زور دیتے ہوئے کہا کہ غزہ کے اپنے فلسطینی بھائیوں کی حمایت میں ہمارا موقف اٹل اور ناقابل تغیر ہے۔
انہوں نے کہا کہ جب تک غزہ پر حملے بند نہ کئے جائيں اور اس کا محاصرہ ختم نہ کیا جائے ہم اپنے اصولی، اخلاقی ، اسلامی اور انسانی موقف سے پیچھے نہیں ہٹیں گے۔