’ایکس‘ پر پابندی غیراعلانیہ نہیں، قومی سلامتی کی وجہ سے ہے، وزیر اطلاعات

وفاقی وزیراطلاعات عطا تارڑ نے امریکی نشریاتی ادارے سے گفتگو کرتے ہوئے کہا ہے کہ سوشل میڈیا پلیٹ فارم ”ایکس“ پر پابندی غیراعلانیہ نہیں، ایکس پر پابندی قومی سلامتی کی وجہ سے ہے، آزادی اظہار رائے روکنے کی کوشش نہیں۔

سوشل میڈیا ایپ پرپابندی عبوری حکومت کے دور میں عائد کی گئی، علیحدگی پسند اوردہشتگرد گروپ سوشل ایپ کو ملک کے خلاف استعمال کررہے ہیں، دہشتگرد سوشل میڈیا پردہشتگردی کی سرگرمیوں کی لائیو کوریج چلاتے ہیں۔

انہوں نے کہاکہ سوشل ایپ پر پابندی کا معاملہ عدالت میں ہے اور وزارت داخلہ نے اپنا جواب جمع کرایا ہے، سوشل میڈیا کیلئے ملک میں کوئی نہ کوئی نظام موجود ہونا چاہیے، ویب منیجمنٹ سسٹم کے تحت سائبر سکیورٹی یقینی بنانے میں کوئی حرج نہیں۔

ڈیجیٹل رائٹس پروٹیکشن اتھارٹی کے بارے میں کابینہ میں ایک قانون آیا تھا،کابینہ نے مؤخر کردیا، کابینہ نے اس قانون کی تیاری میں تمام اسٹیک ہولڈرزکو آن بورڈ کرنے کی ہدایت کی، بطور سیاسی کارکن کہوں گا کہ ایکس کھلنا چاہیے۔