اسلام آباد (شوریٰ نیوز) پاکستان پیپلز پارٹی کے چیئرمین بلاول بھٹو زرداری نے پاکستانی نوجوانوں کو ملک کے بہتر مستقبل کی ضمانت قرار دیتے ہوئے کہا ہے کہ ہمارے نوجوان ہر چیلنج کا مقابلہ اور ہر شعبے میں قیادت کے لیے پرعزم ہیں، اب پاکستان کی ترقی کو کوئی روک نہیں سکے گا۔ پی پی پی چیئرمین نے نوجوانوں کے عالمی دن پر پیغام میں کہا ہے کہ ہمیں پورا یقین ہے کہ خوشحال، مضبوط اور ترقی پسند پاکستان کی تعمیر کے لیے، ہماری نوجوان نسل ہر شعبے اور محاذ پر قیادت کرنے کی صلاحیت رکھتی ہے۔ انہوں نے کہا کہ پاکستان ایک خوش نصیب ملک ہے کہ اس کی 63 فیصد سے زائد آبادی 15 سے 33 سال کی عمر پر مشتمل ہے۔ لہذیٰ، پاکستان کا سب سے بڑا سرمایہ ہمارے نوجوان ہیں۔ چیئرمین بلاول بھٹو زرداری نے کہا کہ پاکستان پیپلز پارٹی نے نوجوانوں کی صلاحیتوں کو ملک کی ترقی اور خوشحالی کے لیے بروئے کار لانے اور انہیں اس حوالے سے زیادہ سے زیادہ مواقع دلوانے کے لیے کوئی موقعا نہیں گنوایا۔ انہوں نے کہا کہ قائدِ عوام شہید ذوالفقار علی بھٹو نے اپنے دورِ وزارتِ اعظمیٰ میں نوجوانوں کو جتنی نوکریاں دیں، اس سے قبل کبھی ایسا نہیں ہوا تھا۔ قائدِ عوام نے تو نوجواںوں کی ایک بڑی تعداد کو دوست ممالک میں بھی روزگار دلوایا تھا۔ شہید محترمہ بینظیر بھٹو کے متعلق تو زبان زد عام تھا کہ "بینظیر آئے گی، روزگار لائے گی”۔ انہوں نے کہا کہ پاکستانی نوجوانوں کو گذشتہ تین دہائیوں میں آخری بار سب سے زیادہ نوکریاں اور روزگار کے مواقع صدر آصف علی زرداری کی زیرِ قیادت عوامی حکومت میں ملے تھے۔ پی پی پی چیئرمین نے کہا کہ پاکستان پیپلز پارٹی آج کے نوجوانوں کو درپیش مسائل اور مشکلاتوں سے مکمل طور آگاہ ہے۔ نوجوانوں کو تعلیم، صحت اور روزگار کے مواقع کی بلاامتیاز فراہمی پاکستان پیپلز پارٹی کی اولین ترجیحات میں شامل ہے۔ انہوں نے کہا کہ نوجوان مایوس نہ ہوں، ہم سب مل جل کر محنت کریں کے اور نوجونوں کے لیے معیاری تعلیم اور روزگار کو یقینی بنائیں گے۔ ہم جھوٹے وعدے نہیں کرتے، جو وعدہ کرتے ہیں وہ پورا بھی کرکے دکھاتے ہیں۔ چیئرمین بلاول بھٹو زرداری نے نوجوانوں کے عالمی دن کے حوالے سے اقوام متحدہ کی رواں سال کی تھیم، (Green Skills for Youth: Towards a Sustainable World) کی بھی حمایت کی اور زور دیا کہ پاکستانی نوجوانوں کو ماحولیاتی تبدیلیوں سے نمٹنے کے لیے قائدانہ کردار ادا کرنا ہوگا، کیوںکہ ان کا ملک کلائمیٹ چینج سے سب سے زیادہ متاثر ہونے والے ممالک میں شامل ہے