وزیر اطلاعات پنجاب عظمیٰ بخاری نے کہا ہے کہ بھارتی گودی میڈیا صحافت کے نام پر سیاہ دھبہ بن چکا ہے۔
بھارتی میڈیا کے پروپیگنڈے پر ردعمل دیتے ہوئے عظمیٰ بخاری کا کہنا تھا کہ گودی میڈیا مودی حکومت کے تلوے چاٹنے میں آخری حد تک پہنچ چکا ہے، ایک جھوٹ مودی سرکار بولتی آگے سو جھوٹ بھارتی میڈیا پھیلانے کا کام کرتا ہے، گودی میڈیا کے نزدیک بھارت نے پورا پاکستان فتح کرلیا۔
انہوں نے کہا ہے کہ پاکستان کے تمام شہر محفوظ ہیں، معمولات زندگی معمول کے مطابق رواں دواں ہے، دنیا کا میڈیا بھارتی حکومت اور گودی میڈیا کا مذاق اڑا رہا ہے، پاکستان کے شہر کے قریب بھی پھٹکنا بھارت کی ناتمام خواہش ہے جو تاقیامت ناتمام رہے گی، انڈین میڈیا کارٹون نیٹ ورک بن چکا ہے۔
ان کا کہنا تھا کہ مودی خود ایک ہفتے سے کسی بل میں چھپ کر بیٹھا ہے، بھارت نے 1965ء میں لاہور فتح کرنے کا خواب دیکھا تھا پھر عبرتناک شکست کا سامنا کرنا پڑا، آج پھر تین دن سے بھارتی فورسز پاکستان کی فورسز سے ذلت آمیز شکست کھا رہی ہے، پاکستان کی فضائیہ تاریخ رقم کر رہی ہے، پاک فضائیہ نے پانچ بھارتی طیارے مار گرائے جس کی تصدیق انٹرنیشنل میڈیا کر رہا ہے۔
صوبائی وزیر اطلاعات نے مزید کہا کہ گودی میڈیا مودی سرکار کی عالمی ہزیمت مٹانے کیلئے پاکستانی طیارے گرانے کی فیک نیوز پھیلا رہا ہے، الحمدللہ پاکستان کے تمام طیارے مکمل محفوظ ہیں، پاکستان کی بہادر افواج ایک ایک انچ کی حفاظت کرنا جانتی ہیں۔