نگران وفاقی وزیر مذہبی امور انیق احمد نے کہاہے کہ افغان مہاجرین پاکستانی پاسپورٹ پر حج پر جاتے تھے، ایسے تمام شناختی کارڈ بلاک کر دیے گئے ہیں۔
انہوں نے کوئٹہ میں پریس کانفرنس میں کہا کہ ہم نے نوجوانوں کو بتانا ہے کہ انسانیت پر مبنی معاشرے کیسے ہوتے ہیں، جڑانوالہ جیسے واقعات کی روک تھام کیلئے مذہبی ہم آہنگی کے اقدامات کر رہے ہیں۔
جڑانوالہ واقعے میں ملوث ملزمان گرفتار ہوئے، انہیں سزائیں بھی ہوئیں، بھارتی ریاست منی پور میں مسیحی برادری کے 150 افراد قتل ہوئے۔
منی پور میں مسیحی برادری کے قتل سے دنیا کی توجہ ہٹانے کیلئے جڑانوالہ کا واقعہ رونما کیا گیا، ہماری کوشش ہے کہ حاجی کیمپ میں حجاج کرام کو سہولیات فراہم کی جائیں۔
پچھلے سال کے حج میں کوئی مسائل نہیں تھے، ہم آنے والے حج کے لیے کام کر رہے ہیں، افغان مہاجرین پاکستانی پاسپورٹ پر حج پر جاتے تھے۔
ایسے تمام شناختی کارڈ بلاک کر دیے ہیں، وزارت مذہبی امور اور آئی ٹی کی وزارت نے ساتھ مل کر حاجیوں کیلئے بہترین کام کیا ہے، حاجیوں کو کیو آر کوڈ کا حامل سوٹ کیس بھی فراہم کیا جائے گا۔
اس سال حج پر جانے والی تمام خواتین کو عبایا بھی دیا جائے گا، گزشتہ سال حج پیکج 11 لاکھ 75ہزار روپے تھا جو اس سال کم ہو کر 10 لاکھ 75 ہزار روپے ہے۔