پاکستان تحریک انصاف کے رہنما شیر افضل مروت نے کہا کہ 15 سال سے پیپلز پارٹی نے کراچی پر قبضوں کے علاوہ کچھ نہیں دیا، ہم وعدہ کرتے ہیں کہ ہر ہتھکنڈے کا جواب 8 فروری کو دیں گے۔
کراچی میں پی ٹی آئی کی جانب سے بلاول چورنگی سے سی وی یو نشان پاکستان تک ریلی نکالی گئی۔ریلی میں کئی عرصے سے پس منظر سے غائب رہنے والے پی ٹی آئی رہنما خرم شیر زمان بھی منظر پر نظر آئے۔
شیر افضل مروت نے کہاکہ ہمارا انتخابی نشان چھینا گیا، امیدوار گرفتار ہوئے لیکن آج بھی انتخابی عمل کا حصہ ہے۔پی ٹی آئی کو لیول پلیئنگ فیلڈ نہیں مل رہی ہے۔
آج کراچی کے عوام خود گھروں سے نکل کر آئے ہیں لیکن جن لوگوں نے انہیں جلسے کی دعوت دی، وہ خود گھروں سے نہیں نکلے، ٹکٹوں کی تقسیم کی مذمت کرتے ہیں جو ٹکٹ ہولڈر آج کی ریلی میں شریک نہیں وہ ہمارے وفادار نہیں۔
اس کے علاوہ شیر افضل مروت نے پیپلز پارٹی کو تنقید کا نشانہ بناتے ہوئے کہا کہ 15 سالوں سے پیپلز پارٹی سندھ پر قابض ہے لیکن آج تک سندھ کو قبضوں کے علاوہ کچھ نہیں دیا، آج بھی کراچی میں شہری پانی ٹینکرز سے خریدنے پر مجبور ہیں۔