کنوینر ایم کیوایم خالد مقبول صدیقی نے کہا کہ انہیں بانی پی ٹی آئی کو ہونے والی سزا سے انتقام کی بو نہیں آرہی، اگر سزا انصاف ہے تو قبول کرنی چاہیے اور انتقام ہے تو کسی کو قبول نہیں کرنا چاہیے۔
انہوں نےایم کیو ایم مرکزکے الیکشن دفتر میں اراکین رابطہ کمیٹی کے ہمراہ پریس کانفرنس کرتے ہوئے کہاکہ دو روز قبل ایم کیو ایم نے اسی انتخابات کے معرکے میں اپنا چھٹا شہید دفن کیا ہے لیکن ایک پتھر تک نہیں مارا، ہمارے صبر کو ہماری کمزوری اور بزدلی نہ سمجھا جائے۔
ایم کیو ایم کے تین دفاتر پر حملے ہوئے اسے تصادم قرار دینا بڑی زیادتی کی بات ہے،تینوں حملے اس جماعت نے کیے جس کا شہری سندھ میں کوئی مینڈیٹ نہیں ہے۔ یہ جماعت گزشتہ پانچ سال سے ایم کیو ایم کے 35 سالہ مینڈیٹ پر قبضہ کرنے کا منصوبہ بنا رہی تھی۔
ماضی میں جمہوریت کی خاطر ایم کیو ایم پاکستان نے بار بار پیپلز پارٹی سے تعاون کیا لیکن انہیں ہمیشہ ڈسا گیا، کراچی کا نتیجہ پورے پاکستان پر اثر انداز ہوگا اور خبردار کسی نے شہر کے مینڈیٹ کو پیسوں اور دھوس دھمکی سے چرانے کی کوشش کی۔