چیئرمین پاکستان تحریک انصاف (پی ٹی آئی) بیرسٹر گوہر نے کہا ہےکہ مخصوص نشستوں پر سپریم کورٹ کے حکم کے بعد حکومت دو تہائی اکثریت سے محروم ہوگئی ہے۔
انہوں نےسپریم کورٹ کے باہر میڈیا سے گفتگو کرتے ہوئے کہا کہ سپریم کورٹ کا فیصلہ ہمارے مؤقف کی تائید ہے، ہماری مخصوص نشستیں دوسری جماعتوں کو دے دی گئی تھیں، اس سارے عمل میں ہم کہتے رہےکہ ہمارے ساتھ غیر آئینی سلوک ہوا۔
ہم کہتے رہےکہ کسی بھی سیاسی جماعت کو اس کی جیتی نشستوں سے زائد نشستیں نہیں مل سکتیں، ہمارا مؤقف یہی تھا کہ سپریم کورٹ کو فیصلہ کرنے دیں، ہمیں عدلیہ پر اعتماد ہے اور عدلیہ کا احترام ہے۔
ہمارے کسی کے ساتھ مذاکرات نہیں ہو رہے، اس فیصلےکا مذاکرات سےکوئی تعلق نہیں، حکومت اب دوتہائی اکثریت سے محروم ہوگئی ہے، ہماری 78 نشستیں دوسری جماعتوں کو دی گئیں۔
الیکشن کمیشن کا آرڈر غیرآئینی تھا، ان سیٹوں کی بنیاد پرحکومت دو تہائی اکثریت کا دعویٰ کر رہی تھی۔
پی ٹی آئی رہنما اور وکیل سلمان اکرم راجہ نے کہا ہےکہ آئین کو بگاڑنے والوں کو آج شکست ہوئی ہے، عدلیہ آئین پاکستان اور جمہوریت کے ساتھ کھڑی ہے۔