امیر جماعت اسلامی پاکستان حافظ نعیم الرحمان نے لاہور میں پریس کانفرنس میں سابق نگران وزیراعظم انوار الحق کاکڑ کو تحویل میں لے کر فارم 47 کے حوالے سے بیان پر تفتیش کامطالبہ کیا ہے۔
انہوں نے کہ انوار الحق کاکڑ نے حنیف عباسی سے کہا تھا کہ ’اگر فارم 47 کی باتیں بتادیں تو کہیں کے نہ رہو گے‘، مطالبہ کرتے ہیں کہ انوار الحق کاکڑ سے پوچھا جائے کہ فارم 47 کے معاملے میں کیا ہوا تھا ؟ اور کیا وہ سب کچھ انہوں نے ہی کیا تھا؟
انہوں نے صحافی کے سوال کے جواب میں کہا کہ انوار الحق کاکڑ کو تحویل میں لینے کا طریقہ موجود ہے، اسی کے تحت تحویل میں لیا جائے،جماعت اسلامی کسی اتحاد کا حصہ نہیں بنے گی۔
کسی مقصد کے لیے اشتراک عمل کسی سے بھی ممکن ہے، جعلی حکومت کے نتائج آزادکشمیر میں عوامی احتجاج کی صورت سامنے آرہے ہیں، حکمران اب عوام کو طاقت کی بنیاد پر دبا نہیں سکتے۔
امیر جماعت اسلامی نے کہا کہ فارم 47 والی حکومت جعلی ہے، چیف جسٹس فارم 45 کی بنیاد پر نتائج مرتب کرائیں، پی پی پی، ن لیگ اور ایم کیو ایم کو عوام پر جبری مسلط کیا گیا۔
حافظ نعیم نے کہا کہ 16مئی کو لاہور میں کسانوں کے حقوق کے لیے احتجاج کریں گے، 19 مئی کو پشاور میں غزہ ملین مارچ کریں گے۔
گزشتہ دنوں اسلام آباد پولیس نے غزہ کے لیے احتجاج کرنے والے طلبہ پر لاٹھی چارج کیا، حکمران بتائیں وائٹ ہاؤس کے باہر احتجاج کیا جاسکتا ہے تو اسلام آباد میں کیوں نہیں۔