صوبہ خیبرپختونخوا کے وزیراعلیٰ علی امین گنڈاپور نے خیبر پختونخوا اسمبلی میں خطاب کرتے ہوئےکہا ہے کہ سابقہ فاٹا کے 400 ارب روپے نہ دیے تو وفاق ردعمل کے لیے تیار رہے۔
انہوں نے کہا کہقبائلی عوام ابھی تک قربانی دے رہے ہیں، سابقہ فاٹا کے لوگ ہم سے گلہ کرتے ہیں، کیا ان کو جواب نہیں دینا؟ لوگ سوال کرتےہیں، میں کیا کہوں کہ پیسےکون کھا رہا ہے؟
سابقہ فاٹا کواب تک 500 ارب میں سے 100 ارب روپے ملے، فوری طور پرپیسے نہ ملے تو ردعمل کیلئے وفاق تیار رہے، امن و امان کیسے بحال ہوگا؟ انسداد دہشتگردی کیلئے مختص رقم میں سے ایک پیسا نہیں دیا، پیسےنہیں دیں گے تو امن و امان کیسےقائم ہوگا؟
منشیات ایک لعنت ہے، بجٹ اجلاس کے بعد قانون سازی کریں گے اور نسل تباہ کرنے والے منشیات فروشوں کو سزائے موت دیں گے، عوام منشیات کے خلاف ہمارا ساتھ دے۔
عمران خان کی سائفر کیس میں بریت پر علی امین گنڈاپور نے کہاکہ بانی پی ٹی آئی جعلی کیسز میں جیل کاٹ رہے ہیں، بانی پی ٹی آئی کو اتنا عرصہ جیل میں رکھا اس کا جواب کون دے گا؟ جس نے بے بنیاد کیس بنایا اس سے حساب لیں گے اور وہ حساب کے لیے تیار رہیں۔
عمران خان نے اگر گھڑیاں لی ہیں تو اس کی اجازت ہے، گاڑی لینے والے وزیر اعظم اور صدر بنے ہوئے ہیں،علی امین نے خیبرپختونخوا کے عوام کو 15 ارب روپے کے آسان قرضے دینے، ایک لاکھ لوگوں کو روزگار مہیا کرنے اور لوڈشیڈنگ سے بچنے کیلئے صوبے میں سولرائزیشن کو فروغ دینے کا اعلان کیا اور کہا کہ حکومت سے جن لوگوں کو فیول ملتا ہے وہ 20 فیصد کم کریں گے۔