پاکستان نے جرمنی کے شہر فرینکفرٹ میں پاکستانی قونصل خانے پر افغان شہریوں کے حملے پر جرمن سفیر کو دفتر خارجہ طلب کرلیا، جرمن حکام نے واقعے کی تحقیقات کرنے کی یقین دہانی کرائی ہے۔
گزشتہ روز افغان شہریوں نے فرینکفرٹ میں احتجاج کے دوران پاکستانی قونصل خانے پر دھاوا بولا، پتھراؤ کیا اور پاکستانی پرچم بھی اتارا۔ رپورٹس کے مطابق افغان باشندوں نے پاکستانی پرچم جلانے کی کوشش بھی کی۔
ذرائع دفتر خارجہ نے بتایاکہ جرمن سفیر کو فرینکفرٹ میں پاکستانی قونصلیٹ واقعے پر شدید تحفظات سے آگاہ کیا اور پاکستانی قونصل خانے پر حملہ آور افغان شہریوں کے خلاف سخت کارروائی کا مطالبہ کیا گیا۔
اس سے قبل پاکستان کے سفارتی حکام نے جرمن وزارت خارجہ سے احتجاج کیا تھا اور فرینکفرٹ میں افغان شہریوں کے ہاتھوں پاکستانی قونصل خانے پر پتھراؤ اور پاکستانی پرچم اتارنے کے واقعے کی تحقیقات کا مطالبہ کیا۔