بلوچستان پولیس کا کہنا ہے کہ ایم ڈی کیٹ ٹیسٹ پیپر لیک کرنے اور بلیوٹوتھ کے استعمال کے الزام میں گرفتار 8 افراد پر تھانہ کرک میں مقدمہ درج کرلیا گیا ہے۔
پولیس مطابق خفیہ ادارے کی اطلاع پر نجی ہاسٹل سے 8 افراد گرفتار کئے گئے تھے، گرفتار آٹھوں افراد کے خلاف مقدمے میں دھوکہ دہی فراڈ سمیت مختلف دفعات شامل ہیں۔
ایف آئی آر کے متن کے مطابق گرفتار ملزمان سے موبائل اور نقل کے ڈیوائسز قبضہ میں لیے گئے تھے۔
خیال رہے کہ خیبرپختونخوا کے ضلع کرک میں میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) میں مبینہ طور پر خفیہ بلوٹوتھ ڈیوائسز استعمال کرنے کے الزام میں 8 افراد کو گرفتار کیا گیا تھا۔
ملزمان کرک سے بلوچستان میں ایم ڈی کیٹ بلوٹوتھ سے ٹیسٹ حل کرنے کی کوشش کر رہے تھے، ملزمان نے امیدواروں کو بلوچستان میں رجسٹرڈ ہونے کا کہا تھا، کرک کے رہائشیوں نے ایم ڈی کیٹ کیلئے خود کو بلوچستان میں رجسٹرڈ کروایا۔
گزشتہ سال کے پی میں ایم ڈی کیٹ ٹیسٹ بلوٹوتھ اسکینڈل کے باعث دوبارہ منعقد کرایا گیا تھا، گزشتہ سال ایم ڈی کیٹ بلوٹوتھ اسکینڈل میں کرک سے ظفر گینگ کے افراد گرفتار ہوئے تھے۔
دوسری جانب پاکستان میڈیکل اینڈ ڈینٹل کونسل کی ترجمان نے کہا کہ ایم ڈی کیٹ ٹیسٹ ملک بھر میں شفاف طریقے سے منعقد ہوا، تمام صوبوں کو سکیورٹی پر خاص توجہ دینے کی ہدایت کی گئی تھی۔
انہوں نے کہا کہ بلوٹوتھ ڈیوائسز استعمال کرنے کی کوشش کی گئی ہو تو ٹیسٹ سے قبل ہی گرفتار ہوئے ہوں گے، امیدواروں کو مکمل تلاشی لینے کے بعد ہی امتحانی مرکز میں چھوڑا جا رہا تھا۔
ذرائع کے مطابق کے پی میں سکیورٹی بڑھانے اور بہتر انتظامات کے باعث یہاں ٹیسٹ پیپر آؤٹ نہیں کرسکتے تھے، ملزمان کا تعلق مبینہ طور پر گزشتہ ایم ڈی کیٹ ٹیسٹ پیپر آؤٹ کرنے والے گینگ سے ہے، سکیورٹی اداروں نے جدید ٹیکنالوجی کی مدد سے پہلے ہی ملزمان کا پتا لگایا تھا۔