محمد ارشد نامی اشتہاری 10برس سے مفرور تھا اور اپنی شناخت چھپا کر مختلف ممالک میں روپوشی کی زندگی گذار رہا تھا۔ ترجمان پنجاب پولیس
لاہور (شوریٰ نیوز) انسپکٹر جنرل پولیس پنجاب ڈاکٹر عثمان انور کی ہدایت پر بیرون ملک مفرور اشتہاریوں کے گرد گھیرا مزید تنگ کر دیا گیاہے جس کے تسلسل میں پنجاب پولیس کی ٹیم مخالف کو قتل اور دو پولیس اہلکاروں کو شہید کرکے اٹلی فرارہونے والے محمد ارشدنامی اشتہاری کو گرفتار کر کے پاکستان لے آئی ہے۔ ترجمان پنجاب پولیس نے بتایا کہ محمد ارشد نامی اشتہاری 10برس سے مفرور تھا اور اپنی شناخت چھپا کر مختلف ممالک میں روپوشی کی زندگی گذار رہا تھا جس کو سپیشل آپریشن سیل، سی آئی اے کی ٹیم نے اٹلی میں ٹریس کرکے اکتوبر میں گرفتار کیا اور انٹر پول کی مدد سے قانونی تقاضے پورے کرنے کے بعد پنجاب پولیس کی ٹیم ملزم کو اٹلی سے لے کر پاکستان پہنچ گئی ہے ۔ ترجمان پنجاب پولیس نے مزید بتایا کہ اشتہاری محمد ارشد نے 2013 میں پولیس حراست میں اپنے مخالف شہاب دین کو قتل کیا تھا اور ملزم سے فائرنگ کے تبادلے میں دو پولیس اہلکاروں گلفان اللہ اور افتخار احمد نے بھی جام شہادت نوش کیا تھا۔آئی جی پنجاب ڈاکٹر عثمان انور نے خطرناک اشتہار ی کو گرفتار کرکے پاکستان لانے والی ٹیم کو شاباش دیتے ہوئے سی پی او گوجرانوالہ رانا ایاز سلیم، انسپکٹر خالد نواز وریا اور سب انسپکٹرچمن شہزاد کی کارکردگی کو سراہا۔آئی جی پنجاب نے قتل، ڈکیتی، اغوا برائے تاوان سمیت دیگر واقعات میں ملوث اشتہاریوں کے خلاف کاروائیوں میں تیزی لانے کے احکامات جاری کیے ہیں اور انھوں نے مزید کہا کہ انٹر پول او ر ایف آئی اے کی مدد سے خطرناک اشتہاریوں کی گرفتاری کا عمل مزید تیز کیا جائے