ایشین کرکٹ کونسل کے زیر اہتمام ٹورنامنٹ کا فائنل میچ ڈے اینڈ نائٹ ہوگا اور پاکستان کے معیاری وقت کے مطابق دن 2 بجکر 30 منٹ پر شروع ہوگا۔
بھارتی ٹیم سپر فور رائونڈ میں پاکستان ٹیم کو 228 رنز سے شکست دے کر فائنل میں پہنچ گئی تھی۔اس کے بعد پاکستان اور دفاعی چیمپئن سری لنکا کے درمیان سپر فوررائونڈ کا پانچواں میچ بھی سیمی فائنل کی حیثیت اختیار کر گیا تھا جس میں میزبان اور دفاعی چیمپئن سری لنکن ٹیم نے پاکستان ٹیم کو سنسنی خیز مقابلے کے بعد ڈک ورتھ لوئس سسٹم کے تحت 2 وکٹوں سے ہر اکر ٹورنامنٹ کا فائنل کھیلنے کا اعزاز حاصل کرلیاتھا۔
ٹورنامنٹ میں 6 ٹیموں نے ٹائٹل کے حصول کے لئے پنجہ آزمائی کی جن میں پاکستان،دفاعی چیمپئن سری لنکا ،بھارت، بنگلہ دیش ، افغانستان اور نیپال شامل ہیں، ان 6 ٹیموں کو دو گروپس میں تقسیم کیا گیا ۔ گروپ اے میں پاکستان ، بھارت اور نیپال جبکہ گروپ بی میں دفاعی چیمپئن سری لنکا ، افغانستان اور بنگلہ دیش شامل ہیں۔
گروپ اور سپر فور رائونڈ مکمل ہونے کے بعد دفاعی چیمپئن سری لنکا اور بھارت کی ٹیمیں فائنل میں پہنچ چکی ہیں جن کے درمیان فائنل میچ 17 ستمبر کو سری لنکا کے دارالحکومت کولمبو میں کھیلا جائے گا۔ بھارتی ٹیم کو سب سے زیادہ 7 مرتبہ ٹائٹل جیتنے کا اعزاز حاصل ہے۔ سری لنکن ٹیم چھ مرتبہ ٹائٹل جیت چکی ہے جبکہ پاکستان کی ٹیم دو مرتبہ ٹائٹل اپنے نام کر چکی ہے۔